K a jingïaksaid jong ki nonghikai skul SSA ban dawa ïa la ka jong ka hok na ka Sorkar Jylla ka long kaba shongnia. Shi syn pyrkhat halor ka jingdawa ban kyntiew ïa ka tulop kaba khlem pynkiew shuh la phra snem kynthih naduh ba ka Sorkar Meghalaya Democratic Alliance (MDA) ba la ïalam da ka National Peoples Party (NPP) ka la bat ïa u kam synshar hapoh ka Jylla la sngewdei shisha ïa ki nonghikai skul ban dawa ïa la ka jong ka hok. Kane ka Sorkar i kumba kam kheiñ ïa ki nonghikai skul watla ka la pynbna ban buh hakhmat eh ïa ka pule puthi hapoh ka Jylla bad ban mang pisa kham bun na ka bynta ban kyntiew ïa ka pule ka puthi. Hato ban shu shna pynbha ïa ki skul bad ban pynbiang ïa ki jingdonkam jong ki skul ka la biang lada ka Sorkar kam lah ban pynbiang de ïa ka tulop jong ki nonghikai kiba hap ban pyndap ïa ka jingdonkam ba bun ha la ka iing ka sem.
Dang shen, ki nongïalam ka Voice of the People Party (VPP) ki la hap ban mih shakhmat ban tuklar ïa ka jingbym ïoh ki nonghikai College ba la shongthait ïa ka Death cum Retiremet Gratuity (DCRG) ba ka Sorkar Jylla ka ju siew 10 lak sha ki nonghikai ynda ki la shongthait ne ki khladnoh katba ki dang trei ïa ka kam.
Haba bishar ïa ka jingïakhih ba khlem pud sngi da ki nonghikai skul SSA kiba don hapoh ka shatri jong ka All Meghalaya SSA School Teachers Association ha Madan Malki, Shillong mynta la khyndai sngi kynthih la shem ba ka jingdawa ka shongnia. Hynrei mynta ka Sorkar ka don hapdeng ka khim khait namarba ka Meghalaya SSA School Association ka la mih shakhmat ban kyntait ïa ka jingdawa ba kyntiew ïa ka tulop hynrei ka la dawa pynban ba ka Sorkar Jylla ka dei ban kynthup noh ne ban pynkynriah noh ïa ki nonghikai skul SSA na ka State Implementation Society (SIS) sha ka tnat Pule Puthi, kaba mut ba yn ithuh noh ïa ki nonghikai skul SSA kiba don palat khatlai hajar ngut ha baroh kawei ka jylla kum ki nonghikai skul Sorkar.
Ka MSSASA ruh ka la aipor ar bnai kynthih ïa ka Sorkar ban pynurlong ïa kane ka jingdawa. Hynrei tip haduh katno kane ka jingdawa kan urlong. U Adviser jong ka tnat Pule Puthi uba dei ruh u Ophisar IAS ba la shongthait hato un ai jingmut kumno ïa ka tnat Pule Puthi haba ki mih kum kine ki ar tylli ki jingdawa. Ngi ïohi ba ki ophisar ha ka tnat Pule Puthi ki hap trud khlieh namarba kine ki jingdawa ki pynjnang ïa ka Sorkar ban shim ïa ka rai.
Lada pynkiew ïa ka tulop jong ki khatlai hajar tam ki nonghikai SSA ka Sorkar kan hap ban bei ïa ka jinglut kaba kot da ki spah klur tyngka namarba ka Sorkar Pdeng ka la ai bhah 90 na ka 100 bad na ka Jylla ka la mang 10 na ka 100. Hynrei lada ka Sorkar ka pynskhem noh ïa ki nonghikai skul SSA da kaba kynthup lang ha ka tnat Pule Puthi kan hap ban bei ïa ka jinglut kaba kot da ki spah klur tyngka. Ka jingkylli kaba mih mynta ka long hato ka Sorkar ka lah neem ban bei pisa? Ka jingïakren ka dang ïaid bad ka shong mynta sa ha ka Sorkar Jylla kumno ban pyrkhat ban pynurlong ïa kine ki jingdawa.
Ka Sorkar kum ka kmie ka hap ban bishar sani bha ïa kine ki jingdawa namar kumba ong ka ktien, ‘nang ïakhun ki hati, kiba ïap dei ki phlang.” Ka jingïakhih ba khlem pud sngi jong ki nonghikai SSA ha madan Malki khlempep kan ktah ruh wat ïa ka pule ka puthi jong ki khynnah skul khamtam ha kum kine ki bnai ba la jan artat sa ki eksamin kut snem. Ki nonghikai skul ruh ki ladei ban pyrkhat bha ïa ka lawei jong ki khynnah bad ban shim da kiwei pat ki sienjam ban pynbor ïa ka Sorkar khnang ba ym pynlong sohpdung ïa ki khynnah skul.
Lada ka Sorkar ka don pisa ban pynlong ïa ki tamasa kiba heh hapoh ka jylla da ki phew tylli tang na ka bynta ka rongphong shi sngi hato ka Sorkar kam lah mo ban pyrkhat noh da kumwei pat ban kiar noh na ki jingpynlong tamasa da kaba wanrah ïa ki nongrwai kiba hap ban siew da ki lak bad ki phew lak ha ka shi khyllipmat katba ki nonghikai bapli ki hap ban mad ïa ka jingsyrtok da kaba ieh noh khamtam ïa la ki khynnah skul bad ïa la ka ing ka sem ban thiah miet sa ha surok tang ban dawa ïa la ka jong ka hok.
Ka jingmih ar kynhun jong ki nonghikai skul SSA ha rilum Khasi bad Jaiñtia ka long kumba aibor ïa ka Sorkar ban leh mon bad ban ym sngap ïa ka jingdawa watla ki nonghikai ki thawlad ban pynlong ïa ki jingïakhih kiba long ha kano kano ka dur.
