Lyngshop ka Mariang ïa ka ri lum Garo shlei um bad twa khyndew iap 3 ngut phet wir hajar ngut
Shillong, Risaw 4 : Ka ri lum Garo ka la shah lyngshop ha ki bor mariang da ka jingther u lapbah khlem sangeh naduh ka Sngi Palei ha kaba la wanrah ka jingshlei um bad twa khyndew kaba jur ha ki lai tylli ki District ka West Garo Hills, South West Garo Hills bad South Garo Hills. Ha kane ka jingshah lyngshop lai ngut ki mynsiem briew ki la khlad bad kumba 2364 ngut ki briew ki la kylla phet wir na ki 17 tylli ki shnong kiba la shah tyllep ha ka umsaw.
Kine kiba khlad ki dei ka Santa N Marak ba 57 snem ka rta na Koinabui, u khynnah rit Miardo P Marak 5 snem ka rta na Sorokpara bad ka Sarika M Marak 18 snem na Kharongngre. Ki don ruh bun ngut kiba la mynsaw jur na ka jingtwa khyndew bad kine ki long Moralistic N Marak 28 snem kaba la shah sumar ha CHC Dalu, ka Parcella A Sangma kaba la kdiah ka kjat, Federick A Sangma kine baroh ar ki dei na Hawakhana bad ki shah sumar ha Civil Hospital Tura.
Halor kane ka jingshah lyngshop ha ki bor mariang u Commissioner bad Secretary ba dei peit ïa ka tnad Revenue bad Disaster Management u Sanjay Goyal u la iïïathuh ha u nongthoh khubor “ Ngi la shim ïa ki lad ki lynti ban ai ka jingïada bad jingïarap ïa baroh kiba ngat ha kane ka apot bad la bthah ruh ïa baroh ki tnad sorkar ba kin ïatrei lang ban ïada bad ïarap ïa ki briew kiba ngat ha kane ka jingshah lyngshop ka mariang. La bthah ïa baroh ki DC bad SP jong ki District ha ri lum Garo ba kin long kiba phikir bad kiba peitngor bha. Ngin ïaleh katba lah ban ïarap ïa baroh kiba ngat ha kane ka apot khamtam ban pynbiang ïa ki jaka sah ïakito kiba la kylla phetwir na ki ïing ki sem bad kumjuh ruh ban pynbiang bam ïa ki.
La phah ïa ki State Disaster Response Force (SDRF) na Tura ban leit sha kitei ki jaka ba shlei um khnang ba kin ïoh ban ïarap ïa ki briew bad ha ka juh ka por ka National Disaster Response Force (NDRF) na Guwahati ruh ki la wan ban ïarap . La phah ruh ïaki SDRF na Shillong ban leit sha ri lum Garo ban ïoh ïarap ïa ki briew kiba mad ïa kane ka jinglyngshop ka mariang.
Ka jinglong jingman ha Tura ka la kham biang namar la pyrshang ban ïada ïa kito ki jaka ba lah ban twa ka khyndew bad ba u slap ruh u la kham duna. Hynrei wat la katta ruh ki don ki jaka kiba dang hap ban peitngor bha. Ka kynhun SRDF na Tura kaba leit sha Dalu ka la sahkut ha shiteng lynti namar ba jur ka jingtwa bad ka jingpyrshang ban pynkhuid ïa katei ka jingtwa ha surok ka dang ïaid shakhmat.
La ïathuh ba ka PHC ha Silkigre ka la shah tyllep ha ka umsaw. Ki trai shnong ki la ïamih ban ïarap ïa ki nurse, ki nongpang ba kin ïoh mih na ka PHC. La nang phah shuh shuh ïa ka kynhun SRDF sha katei ka jaka.
Ha ka jaka hajan ka ïingsah u Lt.Clement Marak kaba don ha Jerusalem Road, lai ngut ki briew kila sahkut hapoh ïing na ka jingtwa khyndew. Da ka jingkloi wan poi ka kynhun SDRF bad SRT, ïa kine ki briew la lah ban sei noh shabar.
Napdeng kine, ka Parcella A Snagma ka la kdiah ka kjat katba u kurim u Dhurbo Newar bad u khun u Fredrick A Sangma kila shu mynsaw malu mala. ïa kine la pynkit noh sha hospital ban ai jingsumar.
Kawei ka Longkmie ba 57 snem ba kyrteng ka Santa N Marak kala iap na ka jingtwa khyndew ha ka shnong Koinabui ha ka por kumba 7:30 baje mynstep bad ka khun ba 28 snem Moralistic N Marak kala mynsaw bad la pynkit sha Community Health Centre ha Dalu ban ai jingsumar. Kine ki arngut ki dang ïatreikam ha kamra shetja ha ka por ba wan lynshop ka khyndew kaba la twa kynsan kynsan.
LINK SITUS SLOT GACOR SERVER THAILAND 2024 BET X200 HARI INI KLIK DISINI