Shillong, Risaw 04: Ka Hynñiewtrep Youth Council (HYC) ha ka sngi Thohdieng ka la byrngem ban pynlong da ka jingïakhih paidbah lada ka sorkar kam mynjur ïa ki 7 tylli ki mat ba la dawa haba ïadei bad ka jingkynrei u drok ha ka jylla.
Ha ka shithi ba la phah sha u Myntri Rangbah ka jylla u Conrad K Sangma, u President ka HYC u Bah Roykupar Synrem u la ong, “Ngi kyrmen bad ngi kyntu ïa ka sorkar jylla ban pyrkhat ïa ki jingdawa kiba shong nongrim jong ka seng na ka bynta ka bha ka miat ki nongshong shnong ka jylla baroh kawei. Bad lada kam don kano kano ka jingshim kam kaba dei da ka sorkar jylla hapoh ka por ba la buh, ngin pynlong da ka jingïakhih paidbah ban pynthikna ba ka sorkar kan sngap ïa kine ki jingdawa kiba don jingmut jong ka seng.”
Kitei ki 7 tylli ki jingdawa ki kynthup ïa ka jingai jingsumar bad ka rehabilitation centre, ka free detoxification, ka OST bad ki centre ki ban ai jingsumar ha ki por mynsngi ha baroh ki district kiba jur ki kam dih drok, ban thaw ïa ki fast track court ne special court na ka bynta ki mukotduma hapoh ka NDPS Act, ka jingtohkit bad ka prosecution case hapoh ka NDPS Act, 1985, ban pynkhlaiñ ïa ki kam pynduna ïa ka jingsam ïa ki drok bad ban buh ïa ka ophis Narcotics Control Bureau (NCB) ha Shillong.
Ïa kane ka rai la shim ha ka jingïalang kaba la long bad ki nongïalam shnong, ki rangbah shnong, ki seng longkmie, ki seng samla bad ki paidbah ha ka 28 tarik u Nailur. Ka jingïalang ka la rai ban sdang noh ïa ka mission kaba la tip ka Drugs Elimination and Enforcement jong ka DREAM (DEED) Mission.
U la ong ba ka jylla ka la pyllait ïa ka Drug Reduction, Elimination, and Action Mission (DREAM) ha ka 27 tarik u Jylliew, 2023 da ka jingthmu ban pynkylla ïa ka jylla sha ka jylla kaba lait na u drok ne “drug free Meghalaya”.
“Kadei ka rukom treikam kaba biang, khlem artatien da ka jingthmu ban pynduh jait ïa u drok bad ban pynlong ïa ka imlang sahlang kaba lait na une u jingdih pynbuaid kaba baroh mangi ngi la kwah. Hynrei kaei kaba sngewkhia ïa ngi ka long ba kane ka Mission ne Policy ka la sdang ban kylla long kum kiwei pat kiba don tang ha ki jingthoh jong ka sorkar kiba long kiba bha tang ha ki kot ki sla hynrei ki la pulom pat ban pyntreikam kumba la kwah. Kumta ban kynjoh ïa kane ka kam bad ki kyndon jong ka DREAM, ngi kwah ban dawa ïa ka jingdonkam kaba kyrkieh bad ka jingtreikam kaba mardor halor kine ki 7 tylli ki mat ba la tyrwa da ka seng,” ong u Bah Synrem ha ka shithi.
Haba batai kham bniah halor kitei ki mat, u President ka HYC u la ong ba ha Meghalaya, ki don tang 10 tylli ki Rehabilitation Centre kiba la bei tyngka da ka Ministry of Social Justice & Empowerment (MoSJE), ka sorkar pdeng, kiba kyrshan da ka jylla ne kiba dei jong ki riew shimet. Ka jinglah ban sumar jong kine ki Centre ka long tang haduh kumba 300 ngut kiba pang katba ki nongdih drok ha ka jylla ki la kiew sha ka 3 Lak ngut kumba la ïathuh da u Myntri ka tnat Social Welfare ha ka Ïingdorbar thaw aiñ ba dang shu kut. Mynta ka jingkylli ka long shano kiwei pat kin ïoh ki lad jingsumar?
“Kumta ka long kaba kongsan ba ki Rehabilitation Centre ba la kyrshan da ka jylla dei ban don ha East Khasi Hills District kham kloi bad ban ai ruh ki jingsumar ïa kiba bun ki nongpang. Kine ki Rehabilitation Centre ki dei ban biang ki tiar nadong shadong kum ka jaka kaba heh na ka bynta ki nongpang ban ïoh leh ïa kiwei ki jaitkam, ki jingshah hikai ne ki therapy, ki jingïalehkai, ki skill development bad kiwei ba ki nongpang kin lah ban leh ha ka por ba ki sah ha kine ki centre,” u la ong.
Halor ka jingdawa ban buh ïa ka ophis Narcotics Control Bureau (NCB) ha Shillong, u President ka HYC u la ong ba kumba ka long mynta ka NCB ka don ka ophis tang ha Assam, Arunachal Pradesh, Manipur bad Tripura.
“Dangshen u Myntri khynnah ka sorkar pdeng uba khmih ïa ka tnat ki Kam Pohïing u Nityananda Rai u la pyntip ba ka Meghalaya ka la kylla long ka jylla jong ka jingïoh rung jong u drok na Manipur sha kiwei pat ki jylla jong ka India. Bad kadei ka jingshisha ba ka Meghalaya ym tang ba kadei ka jaka rung u drok hynrei ka la kylla long ruh ka jylla kaba bun kiba dih drok bad kane ka long katkum ka jingdon kiba dih drok kaba la kiew bha ha u snem ba la dep, kata na ka 2 lak ha u snem 2023 sha ka 3 lak ha u 2024. Kumta ka donkam ban don noh ka ophis NCB ha Meghalaya,” u la bynrap.
