Shillong, Nailur 30: Ha ka Lah Sngi U Blei ka Meghalaya Football Association ka la ïoh ban pyllait paidbah ïa ka prokram ïakhun Quarterfinal jong ka lympung Meghalaya Youth League 2024, kane ka la wan hadien ba la pyndep baroh ki jingïalehkai Round Robin ha baroh saw tylli ki Zone (naduh ka Zone A haduh Zone D).
Baroh ki jingïalehkai kin long ha nongbah Shillong ha ka 5 bad 7 tarik u Risaw, ha kaba ki jingïalehkai ki khynnah U-14 yn pynlong ha MFA Turf – Third Ground, Polo, katba ka kyrdan ïalehkai U-16 yn pynlong ha Madan ïalehkai SAI, kaba ha NEHU.
Kane ka lympung ïalehkai ba thymmai kaba thmu bad pynleit jingmut ban kyntiew ïa ka sap phutbol jong ki khynnah samla, la pynlong da ka MFA ha ryngkat ka jingkyrshan na ka tnat Sports jong ka Sorkar Jylla, ka la sakhi palat 500 kol kiba la ïoh thep na ki kynhun bapher bapher na ki 144 sien ki jingïalehkai ha ka U-14 bad U-16 lyngba ki jingïalehkai ba ki khynnah ki la lah ban pyni ïa ka jingtbit jong ki.
Mynta phra tylli ki kynhun kiba kynsai kin ïalumlang ha Shillong na ka bynta ka wat ïakhun knockout ha kaba kawei pa kawei kan sa mad ïa ka jingshah tynjuh kaba kham jwat ban ïa kaei kaba ki la mad shuwa ka Quarter final.
Ha ka thup kyrdan ki khynnah U-14, ka lahduh jong ka Zone A – ka Tura District Football Association kan aireng pyrshah ïa ka kynhun ba bat kyrdan ba ar (runners-up) ha ka Zone C, ka Shillong Sports Association ha ka jingïakhun kaba nyngkong ha katei ka sngi ha ka por 10 shiteng mynstep, bud sa ka jingïakhun hapdeng ka lahduh jong ka Zone B – ka West Jaintia District Sports Association pyrshah ïa ka kynhun kyrdan ba ar na ka Zone D- ka Pyndengumiong District Sports Association ha ka por 1 baje mynsngi.
Nangta, ha ka 7 tarik u Risaw, ka lahduh jong ka Zone C – ka Ri-Bhoi District Sports Association kan aireng pyrshah a ka kynhun ba ar na ka Zone A – ka North Garo Hills District Sports Association ha ka por 10 shiteng mynstep, bud sa ka jingïakhun hapdeng ka lahduh jong ka Zone D – ka Nongstoin District Sports Association pyrshah ïa ka kynhun kyrdan ba ar na ka Zone B – ka Amlarem Block Sports Association ha ka por 1 baje mynsngi.
Haba ka kyrdan U-16 ki don hynñiew tylli kijuh ki kynhun ba rung quarterfinal ha ka U-14, ka jingïapher ka long tang ka Williamnagar District Sports Association kaba la long lahduh ha ka Zone A bad kan ïatynjuhbor pyrshah ïa ka Shillong SA ha ka por 12 baje mynsngi ha ka 5 tarik u Risaw. Nangta bud sa ka jingïalehkai hapdeng ka West Jaintia pyrshah ïa ka Pyndengumiong ha ka por 2 baje mynsngi. Ha ka 7 tarik u Risaw, ka Ri-Bhoi kan aireng pyrshah ïa ka North Garo Hills ha ka por 10 baje mynstep bud sa ka jingïakhun hapdeng ka Nongstoin pyrshah ïa ka Amlarem ha ka por 12 shiteng mynsngi.
Ka wat ïakhun semifinal pat kan long ha ka 9 tarik Risaw, katba ka phainal ban pynkut noh ïa kane ka lympung ïalehkai kaba itynnad ha ka 11 tarik Risaw.
Hadien ki jingïalehkai ba itynnad bha hapdeng ki kynhun ha ka wat ïakhun group stage, ka jingkhmihlynti ka long kaba khraw ban sakhi ïa ka Quarter final kaba i shongkun, ha kaba baroh ki kynhun ki thrang ban wan hakhmat ha ka jingïaknieh ban long lahduh jong kane ka lympung ki khynnah samla jong ka jylla Meghalaya.
