Nongpoh, Nailur 30: Ha ka sien kaba nyngkong eh, ka North East Cricket Development Council (NECDC) ka la pynlong ïa ka 1st Senior Women Inter-State Friendship T20 Tournament kaba la sdang mynta ka sngi, ha madan ïalehkai Cricket jong ka RBDCA ha Pahamsning, Nongkhrah bala wan ruh ban shim bynta da 6 tylli ki jylla jong ka thaiñ Shatei Lam mihngi jong ka ri India.
Ïa katei ka lympung la pynïaid daka Meghalaya Cricket Association ryngkat ka jingpynbit pynbiang da ka Ri-Bhoi District Cricket Association.
Ha kane ka sngi sdang la sakhi daka jingiadonlang u President ka Meghalaya Cricket Association u Naba Bhattacharjee uba dei ruh u Co-Convener ka North East Cricket Development Council, u President ka Ri-Bhoi District Cricket Association RBDCA, u Bah Rayonald Kharkamni u ba dei ruh u Vice President ka Meghalaya Cricket Association, Bah Ferdinald Kharkamni Vice President ka RBDCA, Bah Micheal Kharhunai Secretary ka RBDCA, Lalrem Ruata Honorary Secretary ka Mizoram Cricket Association lem bad kiwei kiwei.
Ha ka jingïalehkai kaba sdang, ka Arunachal Pradesh ka la ïakhun pyrshah ïa ka Meghalaya bad ka Arunachal ka la jop ha ka kynting pisa bad jied ban tied nyngkong. Ha ki 20 overs, ka Arunachal ka la kamai 78 runs bad duh noh 9 ngut ki nongtied. Haba beh ïa katei ka thong ka Meghalaya kala lah ban tied 78 ron bad duh noh 8 ngut ki nongtied haki 20 over ha kaba ka jingïakhun kala kut noh hapdeng ka jingïakhaid.
Ka jingïalehkai ba ar kala long hapdeng ka Nagaland pyrshah ïaka Mizoram ha kaba ki thei ïalehkai ka Mizoram kila tied nyngkong bad kamai haduh 61 run khlem da ïoh ban tied pynkut ïa ka 20 over, kata da tang 19.3 overs naba hap lut ki wicket.
Ka Nagaland haba beh ïa katei ka thong kala lah ban kamai haduh 62 run tang haki 12.2 overs bad duh noh 5 ngut ki nongtied bad ha katei ka jingïakhun ka Nagaland kala jop pyrshah ïaka Mizoram da 5 wickets.
La sam ruh ïaka khusnam Best player of the Match ha kaba ka jingïakhun hapdeng ka Arunachal Pradesh bad ka Meghalaya la rah da ka Debasmita Dutta na Meghalaya, bad haka jingïakhun hapdeng ka jylla Magaland bad Mizoram la khur da ka Limatola Ao naka jylla Nagaland.
Ka jingïakhun ha kane ka sngi Hat Majai (01 tarik Risaw), ka Manipur kan aireng pyrshah ïa ka Arunachal ha ka Group A ha ka por 9 baje mynstep, bud sa ka jingïakhun hapdeng ka Sikkim pyrshah ïa ka Nagaland na ka Group B ha ka por 12 shiteng mynsngi.
