Da 2 kol jop ka Youngest Boy FC pyrshah ïa ka Marshilong SC ha ka 2nd MU-16 FL 2024

Mawkyrwat, ‘Nailur 30: Ka Khasi Students Union jong ka Mawkyrwat Circle mynta ka sngi ka 28 tarik u ‘Nailur, 2024 ka la ïoh ban plie pyrda ïa ka lympung ïalehkai kynjatbol ba la tip kum ka 2nd Maitshaphrang Under-16 Football League (MU-16FT) 2024 kaba halor ka phang, “Ka lawei ba phyrnai bad ba dap jingkmen, ong ‘Em’ ïa u Drok”, ba la pynlong ha Madan Artificial Turf, Nonglang, South West Khasi Hills District.
Hapdeng ka jingïalehkai, ka Youngest Boy Football Club ka la jop noh da 2 – 1 kol pyrshah ïa ka Marshilong Sports Club ba la thep ïa ka kol ba nyngkong da u Roplang Wanniang ha ka minit ka ba 28 jong ka kyllastep bad bad ka kol kaba ar da u Mebankerlang Kharhari ha ka minit ba 62 jong ka jingïalehkai ha ka kyllamiet.
Ïa katei ka lympung ïalehkai kynjatbol la wan ban plie pyrda da u bah Paul Lyngdoh, Myntri ba dei peit ïa ka tnad Social Welfare jong ka Sorkar Meghalaya kum u kongsan bad u bah Shemphang Nonglang kum u Symbud Kongsan.
Kiwei de kiba ïa donlang ki long u bah Rutherford Lyngdoh, President ka KSU Mawkyrwat Circle kem bad kiwei de ki nongkitkam ba hakhmat jong ka KSU, ki paidbah nongwan peit kai kem bad kiwei de.