Ha ka jingakhe ïa ka Swachhata Hi Seva plie u ADC ïa ka Community Sanitary Complex ha Nongsynrieh
Mawkyrwat, ‘Nailur 29: ka Ophis jong u Executive Engineer (EE) jong ka PHE, Mawkyrwat Division-cum-Member Secretary ka District Swatch Bharat Mission (DSBM), South West Khasi Hills District, kum ka dak ka jingrakhe ïa ka Swachhata Hi Seva bad ka jingdap 10 snem jong ka Swatch Bharat Mission ka la ïoh ban plie paidbah ïa ka Cmmunity Sanitary Complex ha ka shnong Nongsynrieh, South West Khasi Hills District kaba kynthup ïa ka jaka leit shabar ne Public Toilet bad ka ïing bad lum ïa ki tiar ki bym pyut.
Lah ban kdew ba ïa ka Community Sanitary Complex la plie paidbah da u L.T. Tariang, Additional Deputy Commissioner jong ka South West Khasi Hills District kum u kongsan ha ryngkat ka jingïadonlang u bah K. Nongbsaw, Executive Engineer ka PHE Mawkyrwat Division, u bah D.G. Nongsiej, Sub Divisional of School Education Officer (SDSEO), South West Khasi Hills District lem bad kiwei kiwei de ki ophsar jong ki tnat sorkar bapher bapher, nangta ki Myntri bad ki Secretary Shnong bad ki paidbah.
Hajuh hi ka sngi, ka ophis jong u Executive Engineer ka PHE Mawkyrwat Division ka la ïoh ruh ban aiti ïa ki work order sha ki 14 ngut ki briew jong ka shnong Nongsynrieh kiba la ïoh pdiang na ka bynta ka skhim shna paiñkhana ïa kaba la bei pisa da ka Swatch Bharat Mission.
U bah L.T. Tariang, Additional Deputy Commissioner jong ka South West Khasi Hills District haba ai jingkren u la kyntu ïa ki paidbah ba haba la don ki jaka leit shabar bad ki jaka lum ñiut kim dei shuh da lei lei ban shu bret pathar hynrei ki dei bn pyndonkam ïa ki jaka ba la buh kyrpang khnang ba ki shnong ki thaw kin long kiba khuid bad itynnad.
“Ha ka jingplie paidbah ïa ki jaka leit shabar kam shym la thew eh tang ïa ki briew kiba biang ha ka met ka phat hynrei la plie kyrpang ruh ïa ka jaka leit shabar na ka bynta kito ki briew kiba don jingduna ha ki dkhot met”, ong u ADC bad kane ka long ka jingkmen kaba khraw na ka bynta ki paidbah. Ha ka juh ka por u la ai khublei ruh ïa ka shnong Nongsynrieh baroh kawei lyngba ka VWSC kaba la pyntreikam ïa kane ka projek ha ka rukom kaba biang eh.
U bah K. Nongbsaw ha ka jingkren jong u, u la ïathuh ba na ka liang ka ophis ka la ïoh ban sdang ïa kane ka jingrakhe ïa ka Swachhata Hi Seva kaba dei ka prokram jinglehkhuid naduh ka 17 tartik u ‘Nailur, 2024 bad ynsa ïoh ban pynkut ha ka 2 tarik u Risaw, 2024 kaba dei ka lyngkhuh sngi kha jong u kpa jong ka Ri bad ka jaitbynriew kata u Mahatma Gandhi.
Ym tang kata, u la ïathuh ruh ba ha kane ka jingrakhe ïa kane ka sngi kyrpang, na ka liang ka ophis ka la ïoh ban pynlong ïa shibun ki program kum ka jingleit pynkhuid ïa ki ophis, ïa ki skul, ïa ki ïew ki hat bad kumjuh ruh ha ki shnong bad ka ju pynlong ruh ïa ki prokram ban pynsngewthuh ïa ki paidbah nongshong shnong shaphang ka jinglehkhuid leh suba ïa ki sawdong sawkun.