Yn hap shong jingïalang ki ophisar halor ka tyllong umdih ha Umroi naka jingwan ka surok 4 lane

Nongpoh, Nailur 04: Hadien ka jingpyrshah jong ki paidbah naka shnong Umroi Madan halor ka jingïaid ka surok 4 Lane kaba la sorkar kala thmu ban shna naduh lad Umroi sha Malidor namar ka jingktah ïaka tyllong umdih jong ka shnong kaba ju bam ju dih baroh shi katta, ba kum ki paidbah nongshong shnong kila ujor ruh sha u DC ka Ri-Bhoi, naka liang u DC ka Ri-Bhoi mynta ka sngi u la bthah ïa u Bah A Myrthong ADC ka Ri-Bhoi, ki nongmihkhmat naka NHIDCL bad kumjuh ruh naka tnad Water Resource ba kin leit jurip ïa katei ka tyllong umdih haka jingdon lang ki nongïalam shnong bad ki paidbah.
Ha katei ka sngi la sakhi ruh ba u MP ka Lok Sabha u Dr. Ricky AJ Syngkon da ka jingsngewkhia halor ka jingud ki paidbah u la poi lang sha katei ka jaka ban ïakynduh ïaki ophisar bad ban leit jurip hi dala ki jong ki khmat ïa katei ka tyllong umdih jong ka shnong Umroi Madan.
Ha ka jingïatai jong ki ophisar, ki nongïalam shnong bad kumjuh ruh u MP, naka liang ki paidbah kila pynpaw ba kim pyrshah ïaki kam pynroi ba wan haka thaiñ namar kadei ka jingmyntoi jong ki paidbah haka jylla hi baroh kawei hynrei kum ki nongshong shnong ki pyrshah ba katei ka lynti ïaid jong ka surok 4 lane ka iaid lyngba ka tyllong umdih jong ka shnong namar kum ka shnong kam don shuh da kawei pat ka tyllong um dih lada duh ïa katei ka tyllong um.
Shuh shuh naka liang ki ophisar naka tnad Water Resource kila pynshai ba ïa ka jingktah bad ka jingbym ktah ïaka tyllong umdih kim pat lah ban pynthikna bad hap ban pynlong shuwa ka jingwad bñiah ka ban shim por duna eh ïaka 1 snem namar hap ban wad bñiah ïaka jingheh bad rit jong ka um haki aiom bapher bapher.
Halor ka jingpyrshah bad ka jingïaid lynti jong katei ka surok la kan ktah ne em ïaka tyllong umdih naka liang ki ophisar ha katei ka sngi kim pat lah ban ai ïaka jingbatai kaba bñiah hynrei naka liang jong ki kin sa shong da ka jingïalang ban bishar bñiah bad hap ruh ban pynthikna da ki riew shemphang kiba pule ïaka jinglong jingman jong ka um bad ka khyndew ha katei ka jaka.