Mawkyrwat, ‘Nailur 05: Kum shibynta jong ka jingdawa na ka sorkar ban pyntrei noh ïa ka surok na Weiloi shaduh sha Balat – Umpung bad Ranikor da ka Intermediate Roads na ka liang ka Hynñiewtrep National Youths Front HNYF Southern Border Area ha ryngkat da ka jingïadonlang ka FKJGP, KSU bad ki Rangbah shnong jong ka thaiñ ki la pynlong ka jingïalang paidbah ha Ïew Balat, South West Khasi Hills District.
Lah ban kdew ruh ka jingpynlong jong ka HNYF da ka jingïalang paidbah kaba hapoh ka jingïalam u bah Kyllang Thongni, President bad u bah Drimshon Mawlein, Secretary HNYF Southern Border Area ka long namar kane ka surok Weiloi shaduh sha Balat – Umpung bad Ranikor ka la long shisha kaba la sniew sha ba palat ym tang katta kane ka surok ka dei kaba la rim kaba la palat 60 snem tam kaba don shibun ki jingmyntoi kaba lah ruh ban kyntiew ïa ka pla tyngka (Revenues) jong ka sorkar na ka jingdon shibun ki marpoh khyndew, ym tang katta kan kyntiew ruh ha ka ïoh ka kot namar bun ki nongshong shnong na kine ki thaiñ ki dei ki nongrep.
Ha ka jingkren jong ki, ki la ong ruh ba katno sien ka sorkar ka la kular halor kane ka surok Weiloi shaduh sha Balat – Umpung bad Ranikor ban shna pynbha hynrei ki jingkular ki shu kut tang ha ka ktien ym ha ka kam. Ki la ong ruh ba na ka liang ka sengbhalang kim kwah shuh ban ïoh sngewtang ki jingkular hynrei ki kwah ïohi noh ba ha kine ki bnai ban wan ba ka sorkar lyngba u Myntri ba dei peit ïa ka tnad PWD (Roads) ba kin pyntreikam noh ïa kane ka surok Weiloi – Balat sha Ranikor da ka Intermediate Road.
“Lada ka sorkar kan dang sngap mynthi ïa kine ki jingdawa jong ka seng, ka seng kam sa shim ïa ki synjam ki jingïakhih kiba kham tyngeh nangne sha khmat”, ong u bah Kyllang Thongni.
Kiwei de ki nongkren ki kynthup ïa u bah Drimshon Mawleiñ, Secretary ka HNYF Southern Border Area, u bah Pynshai Wanniang bad u bah Entrost Snaitang na ka FKJGP ha ka jingsakhi lang ki ‘riew rangbah bad ki paidbah nongshong ïew.
La pynïaid ïa ka jingïalang da u bah Strong Wanniang uba dei u Secretary jong ka HNYF Dangar Balat Circle.
