Nongstoiñ, Nailur 05: Ka jingrakhe ïa sngi kyrpang kaba 63 jong ki nonghikai la pynlong ha Nongstoiñ ha kaba u Bah R.G. u Momin, MLA & Chairman jong ka Meghalaya Mineral Development Corporation, u long kum u Kongsan ha ryngkat ka jingïadonlang u Bah Edward Marngar I/C SDSEO Nongstoiñ, Fr Marius Thongni Parish Priest, Principal jong ka St Peter’s Higher Secondary School, ki nonghikai skul bad kiwei kiwei ki riew don burom. Ïa kane ka jingïalang la pynlong ha Vanni Hall St Peter’s Higher Secondary School kaba don ha Pyndengrei, Nongstoiñ.
Ïa ka khusnam State Award mynta u snem la pynkup burom ïa u Babu Nearest New Year Lyngdoh jong ka Mawlieh Govt. Upper Primary School na ka bynta ka jingshakri kaba kyrpang jong u ha ka pule puthi. Shuh shuh I Babu Beauty Luella Nongsiej, Assistant Teacher ha Anderson Higher Secondary School, Babu Banetdella Nongphud, Head Mistress jong ka United Christian U.P School Umsaw, bad u Babu G. Ningstar Marthong, Head Teacher ha Mawlangkhar Govt. L.P School, ka la ïoh ïa ka khusnam District na ka DSEO West Khasi Hills namar ka jingnoh synñiang kaba khraw jong ki ha ka liang ka pule puthi.
U Babu Nestor Lyngdoh jong ka St. Xavier’s Secondary School Nongstoiñ u la shah pynkup burom kum u Best Scoutmaster, katba I Babu Ladeitimon Khongmalai jong ka Anderson Higher Secondary School I la shah pynklup burom kum I Best Guide Captain.
Ha kane ka prokram la pyni ruh ïa ki jingshad bapher bapher na ki skul ha kylleng ka district, kaba la pyndap pynbiang ïa ka jinglong jingman jong ka jinglehkmen. La rakhe ruh ïa ka kane ka sngi kyrpang ki nonghikai, ban kynmaw burom bad pyrto ïa ka jingaiti bad ka jingtrei shitom jong ki nonghikai, da kaba ithuh ïa ka bynta ba kongsan jong ki ban thaw ïa ka lawei jong ki kynnah bad samla pule.
