Dawa ka JNC-KC na ka tnat PWD ban maramot noh kloi ïa ka surok ha shnong Khliehriat
Khliehriat Nailur 4: Ka Jaiñtia National Council Khliehriat Circle (JNC-KC) mynta ka sngi ka 4 tarik u nailur 2024 ka la leit ïa kynduh markhmat ïa u Executive Engineer jong ka tnat PWD -NEC Div. Khliehriat, ka seng ka la buh ruh da ka jingthoh bad dawa na ka tnat ba ka dei ban maramot noh kloi ïa ka surok shnong (internal road) ha Khliehriat West bad Khliehriat East kaba la jot rathai kaba la ktah ruh ïa ka burom ka ijot jong ka District Headquarter.
U President JNC Khliehriat Circle, u bah Shanborlang Bamon haba ïakren bad u Executive Engineer u la pynpaw ka jingsngewkhia halor ka jingjot jingpra ki surok shnong kiba don ha Khliehriat bad ong ba kane ka jingjot jingjulor ki surok kala pynsniewdur ïa ka shnong Khliehriat baroh kawei kaba dei ka District Headquarter jong ka East Jaiñtia Hills District, nalor kata u la ong ruh ba ka jingjot jingpra ka surok ka la buh jingeh ïa kiba leit ba wan khamtam eh ïa ki khynnah skul bad ki nongtrei kiba ïa beh ïa ki kam ki jam kiba pyndonkam ïa kine ki surok, ym tang katta, ïa ki surok shnong la pyndonkam ym tang ki nongshong shnong jong ka Khliehriat hynrei la pyndonkam ruh da kiba bun ki paidbah kiba na kiwei kiwei ki jaka ruh kiba wan donkam sha Khliehriat, namar ka dei ka shnong kaba don baroh ki shnat treikam jong ka sorkar, ki jaka pule te la da kane ka Shnong kam long bit ba biang khamtam ha ka bynta ba iadei bad ka surok katno tam kan buh ka jingeh ba khraw ïa ki paidbah.
La ong ruh ba ka seng ka la ju sakhi man ka por ïa ka jingïatyngkhuh kali bad kiwei kiwei ki jingjia tang namar ba sniew ka surok bad kane ka buh jingma ïa ki nongleit nongwan, ka seng ka buh ka jingkyrpad ïa u EE ka tnat PWD Khliehriat ba un sngewbha ban leh ïa kaba donkam tam khnang ban pynsuk ïa ki paidbah nongleit nongwan, namar la da ka surok hi ka shngaiñ ki paidbah ruh u shngaiñ.
La ong ba naka Liang u EE u la kular hakhmat ka seng ban leh ïakaba donam bad u la ong ruh ba shen ka tnat kan sa shna noh ïa ka estimate project na ka bynta kane ka surok bad yn sa pyntip bad pynsngew ruh sha ki bor kiba halor ban ioh leh ïaka ba donkam tam.
Ka seng ka pynpaw ka jingsngewnguh ïa u EE ba u la kloi ban leh ïakaba dei eh bad ka seng hi kaba ju shakri na ka bynta ka bha ka miat kan nang ïai bteng ban shakri kat kaba lah ha ka bor barit na ka bynta ka jingmyntoi ki paidbah, pynkut u kyrwoh.