Durand Cup 2024: Pynkut noh ka NorthEast Utd ïa ka jingïaidlynti ka Shillong Lajong, jop da 3 kol

Shillong, Nailar 26: Ka NorthEast United FC ka la pynpjah noh ïa ka mynsiem ïakhun jong ka Shillong Lajong FC hadien ba ka la pynliem noh da 3-0 kol ha ka jingïakhun ïa ka semi final jong ka Durand Cup 2024 ha JN Stadium ha ka nohphaisngi jong ka Lah Sngi U Blei.
Ar tylli ki kol ha ka kylla step na u Thoi Singh bad na u striker u ba na Morocco- u Alaaeddine Ajaraie bad ka shi kol kaba la pynbud ha ka kylla miet na u Parthib Gogoi ka la pynthikna ïa ka Northeast ban pyndep ïa ka kamram, ha kaba ka klob ka la ïoh ban thaw histori da kaba ïohrung ha ka sien ba nyngkong sha ka final ha ka Durand Cup.
Ha kane ka sngi, u paid nongkyrshan u la poi palat 15,000 kiba bun na ki dei ki nongkyrshan ka Shillong Lajong kiba la shah pynsngapjar tang hadien katto katne minit ba la ïaid ka jingïalehkai hadien ba ka kynhun u Juan Pedro Ben Ali, ka la lah ban pynurlong ïa ka kol ba nyngkong lyngba u Thoi ha ka minit ba 13 bad pynbud sa ïa ka kol kaba ar na u Ajaraie ha ka 33 minit, kiba la ïarap pynrung bol da u rangïalehkai na Spain- u Nestor Roger.
Ka Shillong Lajong ka la pyrshang ban ïalehkai bha hadien kane, hynrei ka jingdon jong ki player kum u Mohammed Ali Bemammer ha ka Northeast ha ki bynta jong ka midfield ka la ïarap ïa ki ban tehlakam ïa ka jingïalehkai shuwa ba u Parthib, ba la bujli da u Ben Ali ha ka kylla miet, u la pynthikna ïa ka kynhun ban khur ïa ka jingjop, da kaba thep ïa ka kol lai minit shuwa ban jam sha ki por pynjlan.
Ka Northeast United FC ka la leh ïa kaba dei eh ban ïoh pynkhihjar dang kloi kaba la pynlong ïa nongkyrshan hala ïing ban sngapjar. Ka jingïatreilang hapdeng katto katne ngut ki player, ba la sdang naduh u Samte ban shimti ïa ka kol na ka throw-in shuwa ban pashat sha u Ajare hapoh phyllaw kol ka liang pyrshah, nangta ban bteng ka jingpashat bol sha u Jithin. Ha kaba khadduh u Jithin u la ïarap pynrung ïa ka bol sha u Thoi ban pyndep ïa ka kamram.
Ka Lajong ka la pyrshang ban ïakhun tyngeh, bad ka bol kaba la khyrwit na jngai na u Hamedamanbha Wahlang ka la wanrah jingma, bad pynlong ruh ïa u Gurmeet rangapkol ka NorthEast ban pynstet khanglad ïa ka bol. Kane ka jingpynsmiej na ka Lajong ka paw shai ba ka Northeast ka donkam sa shi kol ban pynskhem ïalade.
Bad satang 10 minit tam shuwa ban kut ka kylla step, u Nestor u la lah ban pynurlong ïa kane, hadien ba u la lah ban pynrung bol nalor kaba la tam lyngba arngut ki bak ka Lajong ban shem ïa u Ajarie ban pynkhih ïa ka kol kaba ar. U ne u player na Morocco u la lah ban bat sbak ïa ka bol bad kynting nalor u Manas (rangapkol ka Lajong), hynrei ka bol ka la sangah diengkol shuwa ban wanphai biang ha kjat, bad ha ka sien ba ar u khlem shym la pynsepei bad thep ïa ka kol jlang.
Shuwa ba kane ka kol kan ïeng ki nongpynïaid (line man) ki la ai da ka offside hynrei ki la kylla rai hadien, kaba la pynkthang ïa ki player ka Lajong bad ïa ki nongkyrshan.
Hadien ba wanphai ha ka kylla miet, bad u Ben Ali u la sdang ban wanrah jingkylla hynrei u Jose Rodriguez Hevia, ka SLFC u la shaniah tylli ha kijuh ki player ba sdang ha ka quarterfinal pyrshah ïa ka East Bengal. U la bujli ruh ïa u Sangti hadien ba u Ben Ali u la bujli player arngut.
Ka Lajong ka la pyrshang katba lah ban ïoh pynkhihjar hynrei ka Northeast ka la pynskhem triang ha bak bad ïaibteng ban wanrah jingma ïa ka liang pyrshah. Hadien ba la jam sha ka minit pynjlan shuwa ban wai, ka Lajong ka la shah pynduna sha ka 10 ngut naba shah sei red card u Ronney (90+1).
Ha kaba kut u Parthib Gogoi u la pynthikna namjop ïa ka NEUFC da kaba thep ïa ka kol ba lai shuwa ban kut (90+3 min).