Hap pyrkhat bunsien, ngim lah ban pynsangeh ïa ki kali Assam ha Mawïong : Myntri Transport

Shillong, Jymmang 28 : U Myntri ka tnad Transport, Bah Dasakhiat Lamare u la ong ba kim lah satia ban phah sangeh noh ïa ki kali (tourist) ba wan na Assam tang ha Inter State Bus Terminus bad ba nangtei pat kin sa leit da ki kali kamai sha kylleng ki jaka ba ki kwah ban leit.
“Lada ngi pynsangeh ïa ki kali ba wan na Assam hangne kan ym ïarap ïa ka jingjur ka dheng kali ha ka nongbah Shillong,” ong u Myntri haba kren bad ki lad pathai khubor dang shen.
Haba batai bniah shuh shuh, u Myntri u la ong ruh ba lada san ngut ki briew ki wan da kawei ka kali na Assam ynda poi ha Mawiong kin hap ban shim da kawei hi ka kali ban leit sha kylleng ki bynta jong ka Shillong. “Kumta kane kam dei ka lynti ne ka lad ban ïakhun ïa ka dheng kali,” u la bynrap shuh shuh.
Nalorkata, u ong ruh ba ka jingong ban pynieng noh ïa ki kali Assam ha ISBT bad pynïaid noh pat da ki kali Meghalaya kan don jingmut aiu pat ban weng ïa ka dheng kali namar lada ki wan 10 ngut da kawei ka kali, kitei kijuh ki 10 ngut ki hap ban shim biang da kawei pat ka kali ban leit sha ka jaka ba ki kwah ban leit.
“Ka la don ka jingkyrpad kum kata ba dei ban ailad ïa ki kali ba wan na Assam ba kin ieng noh tang ha Mawiong bad nangne shatei pat kin sa leit da ki kali Meghalaya da kaba ong ba katei kan pynïohnong ïa ki briew jongngi kiba don kali. Katei hi kam don jingïadei ei ei bad ka jingkhapngiah ne ka jingdheng kali,” la ïathuh shuh shuh u Myntri.
Haba jubab halor ka jingkylli, u Bah Dasakhiat u la ong ba watla mynta mynta kim pat lah ban rai la kin pdiang ne-em ïa katei ka jingai jingmut u Myntri u la ong, “Ngin peit shwa haduh katno ngi lah, ïoh lashai lashisngi ngi pynsangeh ïa kali Assam hangne bad shim noh da kali Meghalaya da leit mangi pat ïoh u pynsangeh noh tang hapoh Byrni bad nangtei shathie hap shim da kali jongngi, kata kajuh ka jingeh ngin kynduh.”
Katkum ka jingong jong u, hap ban pyrkhat bunsien shwa ban leh ïa katei ka bynta namar lada nangne ki leh kumta, na Assam ruh ki don ka hok ban leh kumjuh. “Kumta nga kwah ïa ki paidbah ba kin sngewthuh ïa kane khamtam namar kan wan beit ka nongkylliang. Hynrei ba ka don pat ka jingkyrpad kadei ka kamram ïangi kum ka sorkar ban wad ki lad ki lynti kaba biang tam na ka bynta ki paidbah.”