Ka jingjaw ka ISBT, pra u dome ka Assembly ki dak ba ka sorkar MDA kan sa khyllem ha u 2023: PN Syiem

Shillong, Jymmang 29: U Bah Pynshngaiñlang N Syiem Working President ka MPCC bad MDC ka Pynthorumkhrah u la ong ba ka jingpei ka ISBT, ka jingpra ki jingkieng bad ka jingkhyllem u dome ka Assembly kadei ka dak ba ka sorkar MDA kan khyllem ha u 2023. Ïa kane u Bah PN Syiem u la ong ha ka jingïalang pynbna ïa u Bah Kansing Lyngshiang kum u kyrtong ka Congress ban ïakhun ïa ka elekshon MLA ha u 2023 na Mawkynrew Constituency.
“Ka jingjaw ka ISBT ha Mawïong, ka jingtwa ki jingkieng bad ka jinghap u dome ka Assembly kadei ka dak jong ka jinghap ka sorkar MDA ha u 2023 bad kan dei ka sorkar Congress kaban synshar wat tieng wat khuslai,” ong u Bah PN Syiem.
U la ong ruh ba ka sorkar MDA ba la jied da u paidbah kam kynmaw ïa u paidbah. “Kaba sngewsih ka long ba ka sorkar ba la jied da u paidbah kam kynmaw issue paidbah. Ka jingkieng dam kaba la dap sanphew snem tam lada khlem ka hukum ka ïingbishar kim pat leit sorbe thymmai ïa ka jingkieng dam. Imat lada ym don ka ïingbishar High Court imat da twa ruh kim lei lei mat ïaduh khaw baroh kawei ka ri Khasi,” ong u Bah PN Syiem.
U la ther tyngeh ruh ia ka sorkar MDA da kaba ong ba kam ju kynmaw eiei ban peit ïa ka khia ka shon jong ki paidbah pynban kaba la hap ban shah hukum beit da ka High Court. “U ñiut ha Jowai, ka jingkhaïi tuh ïa u dewïong la hap ban pynkynmaw da ka High Court. Sngew lehraiñ ban ong ba ka sorkar ba la jied da u paidbah kaba shakri ïa u paidbah pynban hap ban pynkynmaw da ka High Court. Na kane ka daw ko paidbah ha u 2023 kadei ka kabu ksiar na bynta jong phi ban wanrah ka jingkylla ha ka synshar khadar khnang ba ngin ïoh ki nongmihkhmat kiban ai ka jingshakri kaba bha tam ïa ki nongshong shnong,” u la ong.
Shuh shuh u la ong ruh ban jied ïa ki nongmihkhmat ki paidbah kidei ban jied da ki riew Rangbah kiba ieit ïa ka ri bad ka jaidbynriew. “Nga sngewtynnad shibun ba u Bah Kansing udei u samla Rangbah uba lah ih lah ïaw bha jong ka thaiñ bad nga ngeit skhem ba un poi sha ka thong jong ka jingjop.”
“Lada phi jied ïa u Bah Kansing phi lah ban ïakynduh ha kano kano ka por. Leit ha Mawkynrew, ha Jongksha, ha Thangsning phi la ïakynduh don ka ophis treikam bad lada phi jied ïa kiwei phi hap ban kiew sha Jaïaw ne sha Smit. Kumta wat artatien jied ïa u Bah Kansing kum u MLA jong phi ha u 2023,” la ong u Bah PN Syiem.
U la kyntu ruh ïa ki paidbah ba kim dei ban tieng namar ba ka sorkar ha u 2023 kan dei ka sorkar Congress. “Wat ym tieng to ngeit ïanga ba ka sorkar ha u 2023 kan dei ka sorkar Congress,” ong shuh shuh u Bah PN Syiem da kaba pynshisha ba ha u 2018 dei na ka daw ka jingkwah Myntri Rangbah u Dr. Mukul ba ka Congress ka khlem ïoh ban synshar ïa ka Jylla.