Tura, Jymmang 29 : Ka jaidbynriew Garo ka dei ka jaidbynriew kaba riewspah bha ha ka put ka tem, ka shad bad ki dustur tynrai bad ka dei ka rukom ïa uwei pa kawei na ki Garo ban tip bad ban pynneh pynsah ïa la ka riti ka dustur bad lariti hynrei ym baroh lah ban leh ïa kata lait noh tang katto katne ngut bad uwei na kum kita u dei u Dewal M Sangma na Rombagre.
Une u Rangbah u ïai pyrshang naduh mynshwa haduh mynta ban pynneh pynsah bad shna ruh ïa ki tiar tem tiar put tynrai bapher bapher jong ki Garo bad u dei ruh uba tip bha shaphang ka put ka tem bad wat ki sur jong ki jait jingtem ruh.
Une u rangbah u don la ka jongka jaka ai jinghikai kaba la tip kum ka Nok A’chik ha Rombagre, West Garo Hills bad ha kane ka jaka u hikai ban tem ïa ki jingtem tynrai. U hikai ïa ki jait jingtem Dama, Bangsi, Dotrong, Dimchrang, Chigring bad bun kiwei kiwei.
Kiba bun ki paid Garo ki thied ïaki tiar tem tynrai na une u rangbah.Ym tang ba u nang shna hynrei kaba sngewtynnad ka long ba u hikai ïakiwei ruh ban nang ban tem bad put ïa ki jingtem tynrai jongki Garo. U la ju ïashim bynta ruh ha kiba bun ki prokram ba la pynlong da ki tnad bapher bapher jongka sorkar. Kiba kwah ban kham tip bniah shaphang jongu ki lah ban leit ïa kynduh ïa u ha katei ka jaka ai jinghikai jongu ka Nok A’chik ha Rombagre.