Khliehriat, Nailar, 16: U Bah Kynjaimon Amse, uba dei u muktiar na East Jaiñtia Hills District ha ka jingthoh ba u la phah ha ka sngi Thohdieng sha u Chief Forest Officer (CFO) jong ka Jaiñtia Hills Autonomous District Council (JHADC) u la pynpaw ka jingsngew khia bad sngew bitar halor ka jingleh jong ka JHADC ha kaba ïadei bad ka jingïoh syrnot NOC ka Meghatop Cement Private Limited.
U la kynthoh jur ba ka jingïoh NOC ka dei kaba la shu leh buit tuh ne leh thok da ka JHADC bad u la lap ruh shibun kiei kiei ha ka jubab RTI kaba u la ïoh pdiang.
U Bah Amse, u la pan ka jingpynshai na u Chief Forest Officer halor kane ka jingïoh NOC bad ong ba ka JHADC ka la pynkylla kum ka NOC kaba paka ïa ka NOC ba shipor ne ka Provisional NOC ba la ai da u Doloi Elaka Narpuh ha ka 3 tarik, Naiwieng 2022 ha kaba na ka liang u Doloi u khlem kren eiei ruh ha kaba ïadei bad ka jingai NOC ba paka ïa ka Meghatop Cement Private Limited.
“Kane ka dei kaei kaei kaba hap ban shimkhia bha ha kaba ïadei bad ka hok jong ki paidbah jong ka Elaka Narpuh kaba la shu pynkylla tuh ne leh beaiñ da ka JHADC,” la ong u Bah Amse.
“Katkum ka kaiphod RTI ba la ïoh pdiang, ka la paw shai ruh ba ka JHADC kam lah satia ban ai syrnot NOC ïa kano kano ka jingtei ïa ka karkhana dewbilat hapoh ka Elaka Narpuh khlem da ïoh ïa ka syrnot ba paka na u Doloi jong ka Elaka Narpuh,” la pynpaw u Bah Amse ha ka shithi sha JHADC bad la bynrap, ba ka jubab ba la ïohpdiang ka pynpaw ba ka JHADC ka kynnoh ba ka la ïoh pdiang ïa ka NOC na ka Dorbar Elaka/ Dalloi, Elaka Narpuh na ka bynta ban wanrah ïa ka M/s Megha Top Cement Private Ltd ha ka shnong Wahiajer Elaka Narpuh, hynrei la sngewthuh shai ba ka syrnot NOC ba ïoh na u Doloi ka dei tang ka syrnot ba tang shipor ka bym dei shisha kata ka NOC kaba khlaiñ ne kaba ai ka jingkular ba paka ka bym don ruh kata ka kyntien ba ka Dorabar Elaka Narpuh ne u Doloi ba ai ka NOC.
“Kumta la sngewthuh ba kane baroh ka dei ka jingleh thok jong ka JHADC lane ka jingshah ïalam bakla ka M/s Megha Top Cement Private Ltd ha ka JHADC lane ka tnat khlaw (Forest Department) jong ka JHADC ka la leh klet ha kaba ïadei bad kane ka kam ha kaba ïadei bad ki kot ki sla ba la ai da u Dolloi Elaka Narpuh,” la bynrap u Bah Amse.
“Nga sngew ban pynshai ba ka jingdon jong ka JHADC ka long ban ïada ïa ki hok jong ki paidbah trai muluk ym ban shu pynsngewbha ïa kino kino ki tnat ne ki Corporate Bodies khlem da ïakren shwa bad ki trai muluk, ki trai elaka, namar ka don ka aiñ bad ka kyndon hapoh ka elaka Narpuh ba ïa ki NOC yn ym lah ban shu ai klumar sha kino kino kiba mut ban wan shna karkhana khlem da ïoh jingbit na ka Dorbar Elaka Narpuh. Kumta hangne ka paw ba ka JHADC ka la ai syrnot NOC khlem da ïoh ïa ka NOC ne jingmynjur na ka Dorbar Elaka Narpuh” la kynnoh u Bah Amse.
Ha kajuh ka por lyngba ka shithi u Bah Amse, u la byrngem ruh ba un rah ïa kane ka kam sha ki bor jong ka aiñ lada ka JHADC kam lah ban ai ka jingpynshai halor ka jingïoh NOC jong ka Meghatop Cement Private Limited kaba thmu ban tei ha ka shnong Wahïajer kaba hap hapoh ka Elaka Narpuh bad ruh ban ïaid da ka aiñ ban weng noh shisyndon ïa ka NOC ba la ai da ka JHADC ïa ka karkhana.
