Dhaka, Nailar 10: Hadien ba ka la mih ka jingshah pynbor ha ki khynnah samla kiba ïakhih ha Bangladesh ïa ka Myntri Rangbah duh ka Ri Bangladesh ka Sheikh Hassina ba kan hiar shuki noh kum ka Myntri Rangbah duh ka ri, mynta pat ba hadien katto katne sngi ba ki jingjia ïaumsnam ha ri Bangladesh ka la nangjur, kitei ki samla pule ki la dawa pat sa ïa u Chief Justice u Obaidul Hassan ba un hiar shuki noh na ka kam ba u bat kum u nongbishar ba hakhlieh duh ka ri bad kine ki samla hadien ba ki la dawa, ki la pynlong ruh ki jingïakhih pyrshah ïa u bad ki la dawa na ka Supreme Court ba kadei ban phah hiar shuki kam lut ïa baroh ki nongbishar ba kynthup lang ruh ïa u Hassan.
U Hassan u nongbishar ba la 65 snem ka rta u la hiar shuki noh ha ka nohphai sngi jong ka sngi Saitjaiñ, ong ka khubor na ka ri Bangladesh.
Katkum ka khubor ba la pynmih ha ka Daily Star, la ïathuh ba da ki spah ngut kiba ïakhih ha ka sngi Saitjaiñ ki la ker kut ïa ka Supreme Court bad ki la dawa ïa u Chief Justice Obaidul Hassan bad baroh ki nongbishar ka Appellate Division ba ki dei ban iehnoh kam hapoh ka por 1 baje nohphai sngi.
Halor kane ka jingdawa u chief justice u la ïathuh ba u la shim ïa ka rai ban iehnoh kam ha ka por 1 baje nohphai sngi hadien ba ki nongïakhih jong ka seng Anti-Discrimination Student Movement ki la ïalum paidbah sawdong jong ka Supreme Court.
Katkum ka khubor, u Chief Justice u la mihnoh napoh ka jaka treikam jong u hadien ba ka jingïakhih ka la nang jur. Ki nongïakhih ki la byrngem ruh ban leit kerkut ïa ki jaka sah jong ki nongbishar lada kim iehnoh bad ban hiar shuki na ka kam ha shwa katei ka jingai por.
La ïathuh ba ha ka por kumba 10:30 baje mynstep ha ka sngi Saitjaiñ, u paidbhur uba la bun bha ba kynthup ïa ki samla pule bad ki lawyer, ki la sdang ban ïalum hapoh ka jaka jong ka Supreme Court ban dawa ïa u chief justice bad kiwei pat ki nongbishar jong ka Appellate Division ba ki dei ban hiar shuki noh na ka kam ba ki trei.
Lah ban ong ba naduh ba la khie kane ka jingïaumsnam la jan 100 ngut ki nongshong shnong ki la khlad ha kane ka jingïakhih pyrshah bad ki pulit ha kylleng ka ri Bangladesh.
