Shillong, Naitung 21 : Ka tnad Pule Puthi jong ka sorkar jylla ka la rai ba naduh u snem ban wan kan pynrung noh da u QR Code ha ki kot pule ha kaba ma ki lynnong yn hikai lyngba ki video.
Haba pyntip ïa kane, u Myntri ka tnad pule puthi ka sorkar jylla, u Rakkam A Sangma u la ong, “Ngi la ïa kynduh bad kren ïa kane bad ki ophisar jong ka Meghalaya Board of School Education (MBOSE). Kumta naduh ka snem long skul ban wan ngi kwah ban pynrung ïa ki kot pule kiba don ïa u QR Code ha kaba ïa kawei pa kawei ka lynnong kot yn hikai lyngba ka video. Kumta, lada ki khynnah kim lah ban pule bha ha ki klas, ynda ki phai sha ïing bad ha ka jaka ba kin leit khreh kot shabar, ki lah ban sngap ha la ïing na ki jinghikai ha ka video.”
Shuh shuh u ong ruh ba kin sa buh ruh ïa ki kot jingkylli (question paper) kiba 10-15 snem kiba la dep ban jubab da ka MBOSE, ICSE, CBSE, JEE NEET – khnang ban ïarap ïa ki samla pule.
U Myntri u ong ruh ba baroh ki sngewthuh ïa ka daw jong ka jingpep skul shiteng por. “Ngim donkam ban ïathuh ïano ïano ruh naba ngi sngewthuh ïa ki jingeh bad ïa ki ishu hynrei kumno ban weng ïa ka jingeh, kata ka dei ka sienjam kaba dei ban shim da ka sorkar jylla. Ngi dang shim ïa ki lad ki lynti bapher bapher. Hapoh ka jingïalam jong u Myntri Rangbah, ngi la dep ruh ban ïakren.”
Related Posts
Nangta u ong ruh ba u Myntri Rangbah u la dep ban bishar bniah ïa ka jinglong jingman jong ka pule puthi ha ka jylla ha ka taiew ba la dep bad kumta ki la rai ba sdang shwa katto katne ki jingpyrshang na bynta ki khynnah skul bad kumjuh na bynta ki nonghikai.
La ïathuh ruh ba ki la lap ba ka daw kaba nyngkong kam dei shuh kaba thymmai kata haba ïadei shaphang ki kyrdan jong ki skul, ka jingwallam ïa kiba kum kino ki nonghikai, ka jingïapher ha ki skul bad kiwei kiwei.
Da kaba pynpaw ba ki don bun kiei kiei kiba hap ban ïa kren, u Myntri u ong ba kum u MLA uba wan na ka jaka kaba jngai bah ki lap ba don bun ki skul ba ki nonghikai watla ki dei kiba dei na ka laiñ Science ki hikai pat ïa ka jingkheiñ, bad don pat ki nonghikai kiba tbit ha kawei pat ka lain ki hap hikai ïa ka biology. “Ki don bun ki skul kiba na ka Arts Stream kiba hikai pat ïa ka jingkheiñ. Phi lah ban mutdur ba kum kine kiei kiei ki jia.”
Kumta u ong ba ka don ka jingïapher kaba khraw bha ba don ki khynnah kiba ïoh 99 persen bad don pat ki bym lah ban ïoh wat tang 30 persen.