Pynkhreh ka nongbah Shillong ban pynlong ïa ki jingïalehkai ka Durand Cup ha ka sien ba nyngkong

SHILLONG, Jylliew 18: Ha ka Sngi Thohdieng, u Myntri Rangbah ka Jylla – u Conrad K Sangma u la pyllait paidbah ïa ki lai tylli ki trophy jong ka lympung Durand Cup na ka bynta ka Durand Cup 2024, ka ban long ka sien kaba 133 jong ka Durand Cup.
Haba ai jingkren ha ka jingïalang kaba la long ha U Soso Tham Auditorium, u Myntri Rangbah u la ong ba watla ka Jylla ka la thrang ban ïoh pynlong ïa ka Durand Cup ha u snem ba la dep hynrei u la pynpaw ïa ka jingsngewkmen ba kane ka jingangnud ka la urlong mynta u snem.
“Nga dap da ka jingsngewkmen bad ka long kaba kyrpang ïa ka Jylla Meghalaya ba mynta ka la ïoh ban don bynta bad kane ka lympung phutbol kaba la rim tam ha dewbah Asia bad kaba san kum ka lympung ba la rim ha ka sla pyrthei,” pynpaw u Myntri Rangbah ka jylla.
U la bynrap ba ka Sorkar Jylla kan ai ka jingkyrshan ba pura ban pynthikna ïa kane ka lympung kan long kaba jop.
U Conrad u la pynpaw ruh ba ka Sports ka dei ka bynta ba pdeng jong ki polisi treikam bad ki prokram jong ka sorkar. “Ka sorkar barabor ka ju shimkhia ban pynleit jingmut ha ki nongshim bynta katkum ka rukom treikam ba la pynshong nongrim ha ki skhim na ka bynta ka roi ka par ha ka jylla.” u la pyntip da kaba bynrap ba kane ka rukom treikam ka la wanrah shibun ki jingkylla.
U la ong ruh ba ka Sorkar ka la bei tyngka shibun sha ki samla bad ka jingdonkam ban kyrshan khnang ban nang pynkhraw shuh shuh ïa ki ha ki kam ïalehkai (Sports) tang ha kine ki khyndiat snem ba ladep.
“Ha kine ki hynriew snem ba la dep Ngi la pynlut kumba 1000 klur ban bei tyngka na bynta ki jingdonkam ha ka Sports. “Ka jingkyrshan kaba Ngi ai sha ki synjuk ïalehkai bapher bapher(Sports Association), ki seng (organisation) bad ki lympung ïalehkai ka long kaba kongsan,” u la ong.
U la khlei ruh ïa ki jingthmu ba ka Sorkar jylla kaba thmu ban nang pynkhraw ïa ka Sports bad pynpaw ba ka jingbei tyngka jong ka sorkar ïa ki samla ha ki bynta bapher bapher kum ka Sports kan wanrah jingmyntoi kaba khraw.
U la pynkut da ka jingkyrpad sha ki paid nongshong shnong ka Jylla Meghalaya ban ïadon-byntalang ha kane ka Durand Cup 2024 kaba long kawei ka lad ban pynïasoh ïalade bad ban pynpaw ïa ka burom sha ka kynhun shipai ‘Armed force’ jong ka ri India.
Shuwa ka jingkren na u Myntri Rangbah, u Rangbah shipai-Lt Gen Sanjay Malik, GOC, 101 Area u la ïathuh ba hynriew tylli ki jingïalehkai Durand Cup 2024 yn sa ïoh ban pynlong ha nongbah Shillong ha ka sien ba nyngkong.
“Thikna kane kan long kum ka jingsdang na ka bynta kiba bun ki lympung ïalehkai phutbol kiba pawnam ki ban sa long ha nongbah Shillong,” u la ong. U la bynrap ba ka jingdon ki jingïakhun ka lympung Durand Cup ha Shillong kan ai mynsiem ïa ki nongïalehkai phutbol ba dang khie dang san jong ka Meghalaya ba kin nang kiew ha ka phutbol.
U la pyntip ruh ba ki kynhun jong ki ri ba marjan, kata na Nepal bad Bangladesh, kin ïakhun ha kane ka lympung mynta u snem, ïa kaba kawei na ki kynhun ïalehkai na bar ri, ka Tribhuvan Army Football Club na Nepal ka la shah pynïakaplang ha kajuh ka thup ryngkat bad ka Shillong Lajong FC, ka klob na kane ka nongbah ka ban aireng ha kane ka lympung.
Yn plie pyrda ïa ka jingïalehkai ba nyngkong jong ka Durand Cup ha JN Stadium hapdeng ka Shillong Lajong FC ka ban aireng ïa ka Tribhuvan Army Football Club ha ka 2 tarik jong u Nailar, ha ka por 4 baje nohphaisngi.
Hadien kane u Myntri Rangbah ka Jylla u la pynbna ban sdang ïa ka Roadshow ban pyni-nam ïa kine ki lai tylli ki trophy jopng ka Durand Cup ha kylleng ka nongbah bad ki district ba marjan.
La sdang ban pyni-nam kylleng ka ri ïa kine ki lai tylli trophy naduh ka 10 tarik Naitung ba la pynbna da ka President ba donburom jong ka ri India, ka Droupadi Murmu, ba la sdand pynïaid naduh nongbah jong ka ri.
Kiba la ïadon ryngkat ha kane ka Sngi ki kynthup, ïa u Myntri ka tnat ïalehkai ka Sorkar Jylla- u Bah Shakliar Warjri, S P Dharkar-Air Marshal, EAC, Lt Gen Sanjay Malik, GOC, 101 Area, GOC, Bengal sub-area, Vice Chairman DC-OC, Maj Gen Rajesh A Moghe, ADG NCC, Maj Gen Gagan Deep bad u Additional Chief Secretary ka Sorkar Meghalaya, u Dr Shakil Ahammed.