SHILLONG, Naitung 18: Lai tylli ki kynhun ba kynthup ïa ka New Challenger FC, Mawpdang SC bad ka Madan S&CC ki la khur jingjop ha ki jingïakhun kiba la long hynne ka Sngi Palei jong ka lympung phutbol Under-20 Fourth Division ba la pynïaid da ka Shillong Sports Association ha SSA Ground, Polo.
La ïoh ban sdang ïa ka jingïakhun kaba nyngkong ha ka por 11 shiteng mynsngi, ha kane ka jingïalehkai la sakhi ïa ka New Challenger FC kaba la lah ban pynliem noh ïa ka Mawnianglah Youth SC da 2 kol ban khur ïa ka jingjop.
ïa kine ki ar kol ba la wanrah jingjop ïa ka New Challenger la pynkhih da u Lambok June Mylliem Umlong (18 min) bad na u Ginestar Nongneng (65 min).
Ha ka jingïalehkai kaba bud, ka Mawpdang SC ka la khur ïa ka jingjop da kaba pynliem noh da 3 kol ïa ka Mawlyngngad SC. U Patsha Syiem u la ïoh ban pynkhihjar ar kol (8 & 66 min), katba kawei ka la wan na u Pyntiplang Syiem (27 min).
Ha ka jingïalehkai kaba khadduh, la sakhi ïa ka Madan S&CC kaba la pynliem noh ïa ka Umsohsun SC da 2 kol. Kane ka kynhun ka la pynkhihjar ha ka 10 minit lyngba u Adika, bud sa ka kol kaba ar na u Phermanbha Lyngdoh ha ka 25 minit ban pynthikna ïa ka jingjop.
Ki jingïalehkai mynta ka sngi kin sdang biang ha ka por 11 shiteng mynsngi ha SSA Ground, Polo, ha kaba yn ïakhun nyngkong ka Raitsamthiah SC pyrshah ïa ka Nongkolew SC.
Nangta ka jingïalehkai kaba ar kan sdang ha ka por 1:45 baje mynsngi hapdeng ka Diengpasoh SC pyrshah ïa ka Lummawbah SC, katba ka jingïalehkai kaba khadduh ha ka por 4 baje nohphaisngi hapdeng ka Pommura SC pyrshah ïa ka Mawkasiang SC.
