Ka jingbun palat ki nongkloh pla ha ki khyndiat snem ba la dep ha kylleng ki basa ha Ïewduh ka la pyntieng ïa kiba bun ki nongleit ïew ban leit sha ki basa ba kham khapngiah. Hynrei katkum ka jingïathuh da ki nongshong ïew kane ka jingkloh pla ka la sdang thanda mynta khamtam hadien ba ka Hima Mylliem ka la pynjur ïa ki bor pahara kylleng kylleng. Lah ruh ban kdew hangne ba kane ka jingsdang duna ki nongkloh pla kadei hadien ba u CEM ka KHADC Bah Pynïaid Sing Syiem ryngkat u Syiem ka Hima Mylliem bad ki Myntri ka Hima ki la hiar ban jurip khnang kylleng ki basa hadien ba ka la don ka jingud jingnam na ki paidbah halor ka jingbun palat ki nongtuh.
Halor kane, na ka liang ki nongshong ïew da kaba pynpaw ba mynta watla ka jingdon ki nongtuh hynrei ki kwah pat ba ka Hima Mylliem ka dei ban pynbiang ki pulit ïew ha manla ki lad khnang ba ki nongtuh nonglute bad ki nongkloh pla kin kham shynraiñ ban leh ïa kitei ki kam bymman jong ki. Ki la pynpaw ruh ba lada ka Hima Mylliem ka lah ban pynbun ki pulit ïew khlem pep ki nongkloh pla kin ym shlur than ban kloh pla. Ki nongshong ïew ki la pynpaw ruh ba ki nongtuh ha ïew ki dei kiba shalak bha bad teng teng ym ju ïohi kumno ki tuh hynrei la shu ïohsngew ba hylla ki briew ba la shah tuh. La ju ïathuh ruh ba kitei ki nongtuh kim ju kham sngewtynnad ban ap thap ha jaka ba duna ki nongdie nongthied hynrei bunsien hi ki kham beh sha ki jaka bad ki basa ba kham khapngiah.
Kine ki nongshong ïew kynthup na ki basa jhur, basa sohsaw bad ruh ha ha khlieh ïew ki kyntu ïa ka Hima Mylliem khamtam ïa ka KHADC ba ka dei ban pynstet ban buh khambun ki CCTV khnang ba ki nongshong ïew nongwan ïew kin shngaiñ. Ki ong ruh ba ka jingdon ki CCTV kan ïarap ban ïohi dur ïa kito ki nongkloh pla bad kane kan pynsuk pat ban thwet bad kem ïa ki. Ki la kyntu ruh ïa ka Hima ba lada ka tuklar ban wanrah ka jingkylluid ha ki lynti ïaid briew kane ruh ka la dei shi bynta ban khanglad ïa ki nongtuh ban ïoh kabu.Tangba khatduh lada leh kumno kumno ruh ka shong hi ha ka jingphikir ki nongwan ïew ban thep bha ïa ki tiar ba ki wan thied bad khamtam eh ïa ka pisa lym kumta kin hap ban leit phai ïing thylli khlem ïoh thied ei ei.
Lada kren ïa ka jingshisha, kawei pat ka mat kaba kum ka Hima Mylliem bad ka KHADC kadei ban tuklar mardor kadei halor ka khuid ka suba bad ruh ka jingkhapngiah ha ki katto katne tylli ki basa. Kum ka Hima kam dei satia ban ailad ba ki dukan die jingdie khamtam kito ki dukan ba die ïa ki jain, ki tiar bad kiwei kiwei ba kin kyntur pud sha ki lynti ïaid kjat namar nalor ba ka jaka ïaid ka la khapngiah lypa la mih pat sa ki tiar ki tiar kiba la mih sha ki jaka ïaid kjat. Na ka liang ka Hima ka la dei ban tuklar khnang ba lada ki lynti ïaid ha kylleng ki basa ba don ha ïewduh ki kylluid kan buh jingshngain ïa ki nongleit nongwan bad ruh ka wanrah ka jingkylluid ha kadie ka thied.
Ka dei ruh ka kamram jong baroh ban tynrong lang khnang ba kane ka Ïew kaba heh tam ha rilum Khasi bad Jaintia bad ha ka jylla hi baroh kawei kan ym kylla long ka ïew kaba buh jingma jingsyier ia ki nongleit nongwan bad ki paidbah ba wan thied jingthied hynrei kan da long shisha kata ka ïew kaba ki nongwan die jingdie kin da lah shisha ban die ha ka dor kaba biang bad ba ki lah ban leit phai ryngkat ki jingbam jingdih ban rah sha la ïing la sem.
