Kam long kaba bakla ban don bun ki seng bhalang ha ka jylla : ong u Prof Kamailang

Nongpoh, Naitung 18 : Hadien shisnem bala suid la shor ïaka Ri-Bhoi People’s Council katei ka kynhun seng bhalang kala dap shisnem ka jingïaid lynti mynta ka sngi, bad angnud ruh ban dang ai ka jingshakri kaba paka sha ki paidbah ka dong Ri-Bhoi.
Naka liang ka seng kala pynlong ruh ka jingot cake bad ka jingrakhe dap 1 snem haka jingïalang kaba la pynlong mynta ka sngi ha iing Dorbar Nongpoh bala wan ruh ban sakhi da u Prof Kamailang Nongmalieh Asst. Professor ka Sohra Government College kum u kongsan haka jingdon lang kiwei kiwei ki riew rangbah naka dong Ri-Bhoi.
Haba kren ha katei ka sngi naka liang u Prof. Kamailang Nongmalieh u la ong ba kam long kaba bakla ban don bun ki sengbhalang haka jylla namar ki long ka sur jong ki paidbah ban rah sha ka sorkar halor ki mat bad ki jingeh bapher bapher.
U la ong ruh ba ki don ki kynhun seng bhalang kiba pyrshang ban shim ïaki mat tang naka bynta ka jingmyntoi lade, hynrei kum ki sengbhalang bala suid la shor bad mih pyrthei ban shakri sha ki paidbah ki dei ban aiti met bad mynsiem ban shim ïaki mat ki jura bad ki jingeh jong ki paidbah ban pynsngew pat sha ka sorkar
U la kyntu ruh ïaki nongialam ba ki dei ba leit sha ki nongrep bad kylli kaei ka jingeh jong ki nongrep, namar kumba long mynta ia ki mar rep la buh dor da ki nongkhaïi bad ym da ki nongrep, kane ka dei kawei na ka mat kaba ki nongrep ha ka jylla ki ia kynduh jingeh. Haba ia dei bad ka jingeh ki khynnah skul, ki seng bhalang ki dei ruh ban ia kynduh ia ki khynnah skul, khnang ba kin tip ia ki jingeh jong ki bad ruh ba kin rah ia ka khubor sha ka sorkar kumno ban phai khmat kyrpang sha ki khynnah skul.
U la ong ruh kum ka Ri Bhoi District, kaba dei kawei na ka District ba dang sahdien ba la tip ruh kum ka ‘Aspirational District’, kane ka District ka donkam ia ki nongialam, ki seng bhalang ban long kum kita ki nongtied baje na ka sur ban rah ia ki jingeh jong ki paidbah la ka long ha ka District ne ha ka jylla hi baroh kawei ban long kita ki shipai ban iakhun ia ka jingeh ki paidbah kumba u Tirot Sing, u dei u syiem bakhraw uba la iakhun pyrshah ia ki shipai phareng na ka bynta ka jinglaitluid jong ka jaid byrniew bala kynmaw burom ruh ïaka sngi iap jong u mynta ka sngi.
Shuh shuh, kum ka jingai mynsiem ia ki nongialam bad ki dkhot kane ka seng, u Professor Kamailang Nongmalieh, u la ai mynsiem ia ki nongialam ba ki dei ban shim ia kita ki mat ki jura kiba ai jingmyntoi ïaki paidbah bad ban weng ïaka jingeh jingjynjar jong ki ym ban peit tang ka jingmyntoi shimet.
Ha kane ka sngi, la ai jingkren ruh da u President ka RBPC, u Bah Jayson Lennox Nongrum, uba la maitphang ia ka jingiaid lynti ba shisnem ka seng ha kaba shakri sha ki paidbah ka Ri Bhoi bad kum ka seng ka dang donkam ruh ia ki jingai jingmut bad ki jingkyrshan jong ki paidbah, khnang ba kan lah ban ai ka jingshakri kaba paka na ka bynta ka jingmyntoi jong ki paidbah, u la ong.
Kiwei kiwei kiba la ai jingkren ki kynthup ia u Bah Rocky Marwein, u Bah Rocky Kylla, bad u Bah Augustine Wahlang, ha kaba kum ki riew rangbah, ki la dang ai mynsiem ia kane ka seng ba ka dei ban shakri na ka bynta ban kyntiew ia ka Ri Bhoi bad ruh ha ka jylla hi baroh kawei.