Pynkhreh shaid shaid ka ophis u DSO Ri Bhoi ïa ki kynhun ban mihkhmat ïa ka jylla

Nongpoh, Naitung 17: Kum u District Sport Officer ka Ri Bhoi District, u Bah Bobby L. Nongbet mynta ka sngi, u la pynpaw shisha ïa ka mynsiem jong ka jingkmen bad ka jingsarong ïa ka Ri Bhoi District, namar na kane ka District ki 3 tylli ki skul ki la shah jied ban mihkhmat ïa ka jylla sha ka International Subroto Cup 2024, ban sa pynlong ha ki ar tylli ki jaka, kata kawei lymgpung ha Nongbah Delhi bad kawei pat ha Nongbah Bangalore.
Kum ban pynpaw, kitei ki 3 tylli ki skul na Ri Bhoi, kiba la ioh ban mihkhmat ïa ka jylla sha katei ka lympung ïalehkai phutbol ki kynthup ïa ka skkul Mynken Higher Secondary School, Bhoirymbong ha ka kyrdan U-17 ki shynrang, ka Christian Higher Secondary School, Nongpoh ha ka kyrdan U-17 ki kynthei bad ka ka Nongjri Presbyterian Secondary School, Nongjri ha ka kyrdan U-15 jong ki shynrang.
Haba ïa kren mynta ka sngi bad ki Nongthoh khubor, u Bah Bobby L. Nongbet, u la ong na ka bynta ban leit mihkhmat sha katei ka lympung ïalehkai phutbol, ka jingpynkreh na ka bynta ka leit ka wna ki kynhun ïalehkai jong kitei ki skulk ka la dang ïaid shakhmat bad khamtam na ka bynta ki kynthei ha ka kyrdan U-17 ka ban sdang noh naduh ka 5 tarik u bnai Nailur 2024 bad ha kawei ka bynta u la ïathuh ruh ba ka jingïalehkai ka kynhun ki shynrang ha ka kyrdan U-15 kan sdang naduh ka 28 tarik u bnai Nailar, 2024bad katba ha ka kyrdan U-17 ki shynrang pat kan sdang naduh ka 11 tarik jong u bnai Nailur, 2024.
U la ong ruh ha katei ka lympung International Subroto Cup 2024 ka ban long ha Nongbah Delhi bad Bangalore, kin wan ban shim bynta ruh da ki skul na kiwei pat ki ri kiba kynthup ïa ka ri Indonesia, Sri Lanka, Bangladesh, Bhutan bad Nepal bad kum u District Sport Officer ka Ri Bhoi, u la ai ruh kata ka jingkitbok kitrwiang sha baroh lai tylli ki skul na Ri Bhoi District, ba ka jingleit mihkhmat jongki ïa ka jylla kin wan rah ïa ka nam bad ka burom da ka jingjop ba don burom ba kin sa ïalehkai bha ha katei ka lympung ïalehkai phutbol.
Shuh shuh, u la bynrap ruh da kaba ong ba ka Ri Bhoi District, ha ka jingshisha kam don kata ka madan ïalehkai kaba paka kumba don ha Shillong, hynrei ka jinglah kitie ki kynhun na ki 3 tylli ki skul ban ioh mihkhmat ïa ka jylla, ka la pynlong ïa ka sorkar ba kan shim khia kham kloi ban pynbiang ïa ki madan ïalehkai ba paka ha Ri Bhoi khamtam ka jingjop jong kine kei 3 tylli ki skulk an dang kham ïarap ïa ka sorkar jylla ba kan ai noh da kata ka madan kaba paka, khnang ban lah ban kyntiew ïa ki sap ki phong ki khun samla ha ki kam ïalehkai sport, u la bynrap.