Shillong, Naitung 17: Ban pynmih pisa, na ka bynta ka jinglut jingsep, ha kaba pynïaid ïa ki project kiba ka Khasi Jaintia Presbyterian Synod Sepngi ka la seng na ka bynta ki khynnah kiba don ki jingduna haki dkhot met, naduh ka snem 2011, ka shnad threikam jong ka KJP Synod Sepngi kaba khmih ïa kine ki project kaba la tip kum ka Social and Economic Life Development Department (SELDD) lyngba ka Agency for Sustainable Development Initiatives (AfSDI), ka la pynlong ïa ka jingïakob thong kabala ai kyrteng “Shillong Run 10K”.
Mynta ka snem 2024 ruh, ïa ka “Shillong Run 10K” yn pynong biang haka 3 tarik u Nailar (August) bad ïa kane, la pynbna da ki dkhot jong Social and Economic Life Development Department, haka jingïakynduh bad ki nongpathai khubor ha Shilong Press Club haka 16 tarik mynta u Naitung 2024, ba la lamkhmat da u Executive Secretary ka KJP Synod Sepngi u Pastor RT Shangdiar bad u Pastor Bidonbok Syiem bad kiwei de ki pastor.
Ka jingthmu halor ka jingpynlong ïa kane ka jingïakob mareh thong, ka long ban pynmih pisa na ka bynta ban pynïaid ïa ki lai tylli ki project jong ka KJP Synod Sepngi, ba kynthup ïa ka Mairang Vidyajyoti Inclusive Secondary School, Mairang, ka skul ha kaba ki khynnah pule ki ïakhleh lang bad kiba don jingduna haki dkhot met bad kiwei pat, nangta ban pynïaid ïa ka ïing ïasylok bad kiba la long mraw haki jingdih pynbu-aid kaba la tip kum ka Community Based Rehabilitation Centre, Mairang bad na ka bynta ka Rev. Amirkha School for Disabled, Mawlai.
Ïa kane ka jingïakob mareh haka 3 tarik u Nailar yn pynlong naduh ka por 5:30 mynstep, ha kaba yn sdang na ka jaka pynïeng kali kaba Polo. Ki nongïakob mareh kiba naduh ka 18 snem shaneng, ki hap mareh lyngba ka surok Parking Lot Polo, lyngba ka Jingkieng ïew Polo, Lad Lawmali, Jaiaw Jingthangbriew, Jaiaw Mawbynna, Jaiaw St. Joseph, Jaiaw Pdeng, Lad Jaiaw Lansonalane, Jaiaw Shyiap, Balang Presbyterian Riatsamthiah, Umsohsun, Sani Mandir (GS Road), Khyndailad, Raj Bhavan, Barik, Dhankheti, Don Bosco Square, Shillong Commerce College, PGT College, B.K. Bajoria School, Saw Furlong bad pynkut biang ha Parking Lot, Polo.
Na ka bynta kito kiba dang hapoh ka 18 snem ka rta bad kito kiba don jingduna haki dkhot met, ka lynti ba kin hap mareh lyngba ka long na Parking Lot, Polo lyngba ka Jingkieng ïew Polo, Lad Lawmali, Jaiaw Jingthang briew, Jaiaw Mawbynna, Jaiaw St. Joseph, Jaiaw Pdeng, Lad Jaiaw Lansonalane, Jaïaw Shyiap, Balang Presbyterian Riatsamthiah, Umsohsun, Sani Mandir (GS Road), Khyndailad, Pegasus Hotel, Hotel Polo Towers, bad pynkut Parking Lot, Polo.
Baroh ki nongwan ïashim bynta ha kane ka jingïakob, kin hap ban siew ka bai pynrung kyrteng, ka ban long naduh T.300/- haduh T.700/- katkum ka jingïapher ka rta, hynrei na ka bynta ki briew ba don jingduna ha ki dkhot yn don tang ar tylli ki Category kata hapoh ka 15 snem (Juniors) bad 15 snem shaneng (Seniors) kim donkam ban siew ïa ka bai registration.
Kiba don ka jingthmu ban ïashimbynta ha kane ka jingïakob ki lah ban pynrung kyrteng lyngba ka ‘online’ ha kine ki link https://forms.gle/wyDXRjYHvbfVFPT97 lane lyngba ka website www.afsdi.org bad https://www.afsdi.org/shillong-run-2024. Bad na ka bynta kito kiba ym nang ban pynrung kyrteng lyngba ka ‘Offline’ ki lah ban leit shim ïa ki Form na ka ophis treikam jong ka KJP Synod Sepngi, ha Mission Compound, Shillong.
Ki nongjop ha kane ka jingïakob, nalor ki takma, kin ïoh khusnam ruh da ka pisa, ha kaba haka jingïakob hapdeng kito kiba ka rta kalong naduh 18 haduh 35 snem kaba long ruh ka Open Category hapdeng ki shynrang bad ki kynthei, ba jop ba nyngkong yn ïoh khusnamn T.50,000/-, ba wan ba-ar yn ïoh T.30,000/- bad ba jop haka kyrdan ba lai yn ïoh T.20,000/-. Katba ia kiwei kiwei pat ki jingïakob ki khusnam kin T.5,000/- ïa u ne ka lahduh, T.3,000/- ba jop haka kyrdan ba-ar bad 2,000/- haka kyrdan ba lai. Kan don ruh ka Consolation prize na ka bynta kiba jop naduh kiba wan haka kyrdan kaba 4 haduh 10. hynrei kane ka khusnam da ka pisa kan long tang ha ki jingïakob kiba hapoh 15 snem ka rta, 15 haduh 18 snem; 18-35 snem; bad ia ki briew kiba don jingduna ha ki dkhot met.
Na ka bynta ka jingtip kaba kham bha ki nongïashim byna ki lah ruh ban peit na ka Website- www.afsdi.com. ne phone ha kine ki phone number + 91 87875- 45266, + 91 89747- 61582 + 91 94365-57222.
