Pynkhreh ka sorkar ban tei ïa ka Administrative City bad Knowledge City ha New Shillong

Shillong, Naitung 14 : Ka sorkar ka la pynkhreh shaid shaid ban sdang tei noh ïa ka Administrative City bad ka Knowledge City ha New Shillong bad ka jingpynkhreh ïa ka master plan na ka bynta kine ki jingtei kan sa dep hapoh ka lai bnai.
ïa kane la ïathuh da u Symbud Myntri Rangbah ba dei peit ia ka tnad Urban Affairs u ma Sniawbhalang Dhar haba ïakren bad ki nongthoh khubor.
Lah ban pynkynmaw ha ka 16 tarik Nailur 2023 ka sorkar jylla ka la mang 200,00,00,000 klur tyngka na ka bynta ban pynkhreh ïa ka Master Plan bad ban tei ïa ka Administrative City ha New Shillong namar ka kynhun Myntri kaba la long ha ka 17 tarik Kyllalyngkot 2022 ka la dep rai ban pynkynriah noh ïa baroh ki ophis sorkar sha New Shillong.
Na ka bynta kane ka Administrative City ka sorkar ka la dep thied ruh ïa ka jaka 807.7 acre. Ka jingthmu ban pynsted tei noh ïa kane ka jingtei ka long ban ïoh pynkynriah ïa baroh ki ophis sha New Shillong khnang ban kham pynduna noh ïa ka jingdheng kali ha kane ka sor Shillong.
U Symbud Myntri Rangbah ula ïathuh ba ka sorkar ka la dep mynjur ruh ïa ka jingpynwandur (Design) na ka bynta kane ka Administrative City bad la dep wanrah ruh hakhmat ka kynhun myntri kaba dang shu dep ïakynduh dang shen. ïa kane ka master plan ruh la phah leh sha bar ri ym shuh hapoh India.
Ha kane ka Administrative City kan don ka Secretariat bad ki ophis Directorate kiba yn pynïasoh da ka lynti ïaid na suiñ ( sky walk) kaba jngai 500 metre.
Shuh shuh u Symbud Myntri Rangbah u la ïathuh ba ïa ka Master Plan na kabynta ka Knowledge City yn sa pynkhreh noh shen. Ka sorkar ka la mang ban pynlut 10,000 klur tyngka ban tei ïa ka Administrative City bad Knowledge City.
U la ïathuh ba ïa ka Unity Mall na ka bynta ka New Shillong ruh yn sa sdang tei noh shen ha ka jingmang pisa kaba 216 klur tyngka.