Ha u Saleng shaniah ka Congress na bynta ka by-election ha Gamgbegre yn sei ka NPP da ka kurim u CM

Shillong, Naitung 14 : U Working President ka Meghalaya Pradesh Congress Committee (MPCC) Bah Pynshngaiñ N Syiem u la ïathuh ba kum ka party ka la dep ban ïa syllok hapdeng ki nongïalam ka party haba ïadei bad ka jingpynkhreh na bynta ka elekshon shiteng samoi ha Gambegre Assembly constituency hadien ba u MLA katei ka thaiñ u Saleng A Sangma u la shah jied noh kum u MP ba thymmai ka Tura Parliamentary Constituency.
Haba kren bad ki lad pathai khubor, u Bah PN Syiem u la ong ba ïa ka kam ki shaniah mynta ha ka Block Congress jong ka Gambegre khamtam eh bad u MLA ba rim bad MP ka party na bynta ka jingpynkhreh ïa ka elekshon.
Shuh shuh u ong ba hadien ba la dep na ka Block, District Congress yn sa phah pat sha ka MPCC ryngkat ka jingtrei lang bad u Nongmihkhmat ba rim na ka bynta ban pynskhem pat ïa u/ka kyrtong.
“Ngi sngewthuh ba ha rilum Garo hi ki Block Congress baroh khamtam eh ha Gambegre ki la long pynkhreh namarba ka elekshon kan ym slem shuh ban long,” u la bynrap biang.
Halor ka jingkylli halor ki kyrtong kiba wan ban pan tiket, u une u heh Congress u la ong ba haduh mynta hi katei ka thaiñ ka shaniah ha u Saleng bad kumta kin burom ïa kata hi ka rai. “Watla katta la ailad ïano ïano kiba kwah ban pan tiket namar kaba kut dei ka Block, ka District Congress, ka MPCC bad ka AICC ban rai.”
Shuh shuh haba jubab halor ka jingphriang ki khubor ba bun ki kwah ban ai tiket ïa ka Deborah Marak MLA bad Symbud Myntri Rangbah barim ka jylla, na ka liang u Bah Pynshngaiñ u la ong ba kim pat kwah ban ong ei ei halor kane ka bynta namar katei kadei ka kam pohiing jong ka Block bad jong u MLA barim bad MP ba mynta.
Katba na ka liang ka National People’s Party (NPP) pat la ïoh jingtip ba ka District Committee ka la dep phah ïa ka kyrteng jongka kurim jongu Myntri Rangbah ka Mehtab Chandee Sangma ban ia aireng ha kane ka bye election na Gambegre.
“ ïa ka kyrteng jongka kurim u Myntri Rangbah la dep jied bad mynjur da ki dkhot jong katei ka constituency bad ki nongïalam ka NPP na ri lum Garo” ong uwei na ki nongïalam bym kwah ban pynpaw kyrteng.
Na ka liang u National President ka NPP uba dei u Myntri Rangbah ka jylla u Conrad K Sangma u la ïathuh ba ka party kam pat shim rai halor ka jingtyrwa jongka State Committee ha kaba ïadei bad ka jingai tiket ïa u ne ka kyrtong ban ïakhun na Gambegre Constituency.
“ Ngi la ïoh pdiang ia ka jingai jingmut bad kyrteng ba la jied da ka State Committee tangba ngim pat shim rai. Dei hadien ba la dep mynjur da ka National Committee ba yn sa phah ïa ka kyrteng sha ka State Committee ban pynbna ïa ka kyrteng mano ban ïa aireng na ka NPP” ong u myntri rangbah. Haba la kylli ïa ka kyrteng u myntri rangbah u pynpaw ba um pat kwah ban ïathuh ïa mynta.