Tur ki paidbah sha ka ophis DC Ri Bhoi ban aiti dorkhas dawa pynlait ïa u Rangbah ba kem ka tnad Forest Assam

Nongpoh, Naitung 08: Ki nongshong shnong kiba la ïaid paidbah ha ka sngi Nyngkong ha Patharkhmah halor ka jingshah kem u rangbah na ka Shnong Belahari, ki la hap ban wan tur sha ka ophis u Deputy Commissioner ka Ri Bhoi, kaba dei hadien ba ki ïoh lad ban aiti ïa ka dorkhas ha u SDO ka Patharkhmah Civil Sub Division, na ka daw ba um shym la wan trei ha katei ka ophis treikam jong u, kaba don ha Patharkhmah.
Naduh ki longkmie, ki longkpa, ki khynnah skul, ki nongïalam sengbhalang bad ki riew rangbah ki la hap ban wan tur shaduh sha Nongpoh, na ka bynta ban leit aiti ïa ka dorkhas sha u Deputy Commissioner ka Ri Bhoi, halor ki mat ba ki la dawa ban pynlait ïa u rangbah ba la shah kem ha ka tnad Forest jong ka Assam.
La iohi ba ha kane ka jingïa ïaid paidbah la iohi ba da ki spah ngut ki la ïalum hajan ka ophis u Deputy Commissioner ka Ri Bhoi ban ïa pynpaw ïa ka jingpyrshah halor ka jingshah kem u rangbah khlem da don kano kano ka nongrim ha ki bor ba dei peit jong ka tnat Forest ka Assam bad lyngba jong kane ka sngi tang katto katne ngut la shah ban rung sha ka ophis u DC, ba ki la ïohlad ban aiti ïa katei ka dorkhas kaba ki la buh halor ki jingdawa na ka bynta ka jingshah kem utei u rangbah.
Kumba la pypaw ha katei ka dorkhas, ki mat ba hakhmat jong ka dorkhas, ka long ba ki dawa na ka sorkar Meghalaya ba ka dei ban ïakren mardor sha ka sorkar Assam, na ka bynta ban pynlait noh ïa u Bah Bakstad Diengdoh na ka Shnong Belahari, ba la shah kem ha ki bor ba dei peit ka tnad Forest jong ka jylla Assam.