Da ki lama bad banner ïaid paidbah ha Patharkhmah, ban dawa pynlait ïa u rangbah ba kem ka tnad Forest ka Assam

Nongpoh, July 08: Naduh ki khynnah skul, ki longkmie ki longkpa, ki samla bad ki riew rangbah ka thaiñ Western Ri Bhoi ha ka sngi Nyngkong, ki la mih madan ban ïaid paidbah ha Patharkhmah, na ka bynta ban dawa na ka tnad Forest jong ka Assam bad ruh na ka sorkar Meghalaya ba dei ban pynlait noh mardor ïa u Rangbah na ka shnong Belahari, uba la shah kem ha ka tnad Forest jong ka Assam.
Kum ban pynkynmaw, ki paidbah ki la mih madan ban ïaid paidbah bad rah da ki lama bad ki banner kum ka jingpyrshah jur, hadien ba u Bah Bakstar Diengdoh u la shah kem noh ha ka tnat Forest ka Assam ha ka 3 tarik u Naitung 2024, kaba la shu kem tang ba u la leit ban tam maw na ka bynta ban pynbha ïa ka surok shnong jong ka shnong Belahari.
Kine ki paidbah ki la ïaid bad pynmih ruh da kawei ka sur, ba ki pynrem jur ïa ki kam thombor ka tnad Forest Assam bad ruh ki Pulit ka Assam, namar bunsien lyngba kitei ki kam thombor na Assam ka la wanrah ïa ka jingbym shongsuk shongshngaiñ ki paidbah ha ka thaiñ Khappud.
Ha kane ka sngi, ki la leit tur ruh sha ka ophis u SDO ka Patharkhmah Civil Sub Division ban leit aiti ïa ka dorkhas halor ki mat ba la dawa, kaba dei halor ka jingshah kem utei u rangbah, hynrei kum ki paidbah ki la pynpaw ïa ka jingsngewsih namar kim shym la lap satia ïa u SDO ba un don ha katei ka ophis treikam jong u.
Ki nongïalam sengbhalang bad ki riew rangbah, haba kren ha kane ka sngi, ki la pynrem jur ïa ka jingleh donbor ka tnad Forest jong ka Assam, kiba la kem ïa utei u rangbah khlem da don nongrim bad ki la pynpaw ruh, ba kum kine ki kam thombor ba ki paidbah ki ïakynduh na ka por sha ka por ha kaba kane ka long kaba ym lah ban pdiang lyngba kine ki kam thombor ka Assam.
Hadien katei ka jingïaid paidbah, jan baroh ki nongkren, ki la dawa mardor na ka sorkar Meghalaya, lyngba u Myntri rangbah, ba ki dei ban ïakren noh mardor sha ka sorkar Assam, na ka bynta ban pynlait noh mardor ïa utei u rangbah khlem da don kano kano ka jingteh kyndon bad lada kum kine ki kam thombor ka Assam kin dang ïai jia, ki la byrngem ruh ba kim banse ban shim da kiwei ki lad ki lynti ban ïaleh pyrshah, namar kane ka la ktah shisha ïa ka shongsuk shongsaiñ ki paidbah ha kitei ki shnong khappud.