Mynshuwa nga dei u nongwad kam mynta nga la lah ban ai kam pynban ïa ki khun samla
Plie u samla da ka ïing basa ha Umroi
![](https://mawphor.com/wp-content/uploads/2024/04/plie-Copy.jpg)
Nongpoh, Lber 31: Ka jingangnud jong uwei u samla naka thaiñ Umroi ban seng kam bad ban ïeng hala ki jong ki kjat, ka dei ka khubor kaba ai mynsiem ïakiba bun ki khun samla ha kane ka juk ba mynta ba kim dei ban duh jingkyrmen than haka jingim namar ka lad ka lynti hi ka wan lada u briew u trei shitom bad minot.
Une u dei u samla Pynhun Rynghang naka shnong Umroi Nongrah, da ka jingïai shah bad ka jingtrei shitom utei u samla u la lah ban plie paidbah syndon da kawei ka iing basa kaba u la ai kyrteng Red Rose Resort kaba don haka shnong Umroi Umden Umsaitprah, ha syndah jong ka kad liengsuiñ Umroi Airport bad ïa katei ka ïing basa la wan ban plie da u Bah RR Kharbuki MDC ka Umroi.
Na ka liang u samla Pynhun Rynghang u la pynpaw ka jingsngewkmen kaba khraw ba u la lah ban pynurlong ïaka jingangnud jong u kaba la slem ban plie ïa katei ka iing basa kaba long ruh ka jaka kaba u lah ban aikam ïa kiba bun ki khun samla.
“Mynshuwa nga dei u nongwad kam hynrei mynta lyngba ka jingkyrkhu u Blei nga la lah ban ieng hala ki jong ki kjat bad ioh ruh ban ai kam kylla ïaki para samla ha kane ka juk kyrduh kam” la ong u Samla Pynhun da kaba bynrap ruh ba ha katei ka Red Rose Resort ki don ruh ki samla kiba la trei shabar ka jylla kum ka Oberoi Hotel ban sah jngai nala iing hynrei mynta kim donkam shuh ban leit phai sha ri thor bad ban leit jngai hynrei ka long ka lad ïaki ban trei hala ka jong ka jaka. Ha kane ka jaka ki don ki jaka sah naka bynta ki longiing, ki jaka bam, jaka jngi bad kiwei kiwei.