Nongstoiñ, Lber 31: Ka Hynñiewtrep Youths Council West Khasi Hills District ha ryngkat ka HYC Ri Muliang Circle, hapoh ka jingïalam u samla Lumlang Kharsyiemlieh President HYC West Khasi Hills District, ki nongïalam ka Circle samla Disterborlin Waniang President bad samla Shaiñborlin Syiemlieh General Secretary, ha ka sngi saitjaiñ ki la hiar ha ka shnong Langja ban ïarap ïa u Heprit Isboklang Waniang 12 snem ka karta na katei ka shnong.
Utei u Heprit u la shah bat ha ki waïar light line heh ha katei ka shnong ha ka 23 tarik u Lber 2024, ha ka por ba u leit siat sim ha khlaw hapoh shnong, namar ki wire ki ïajan palat ha u maw u ba ki khynnah ki ju kiew. Hateng Hateng ki tbian eh ka sa poi ha uta u pud bad mynsaw jur ha ki bynta jong ka kti, kjat bad khlieh utei u khynnah.
Ha ka jingleit sngew lem da ka seng, la ïoh ban pynlong ka jingïalang lyngkot ha katei ka Ïing ka kmie utei u khynnah, ka kong Ribelti Waniang bad la pynïaid da u samla Disterborlin Waniang President katei ka Circle, u ba la ong ka seng ka dap da jingsngewdiaw haba ïohi ïa kane bad kan sah leh kaba donkam.
U samla Lumlang Kharsyiemlieh President HYC West Khasi Hills District, u la ong, “Mar ïa ïoh jingtip ïa kane nga la duh thiah duh dem shisha bad lyngba ka jingplie lad u Blei, ngi wan mynta ban ïarap ïa phi da ka ba ïa lum u synñiang na ki para dkhot ka seng. Kumba ong ka ktien u Blei ka dei ka hukum U Blei ban ïarap lem ban ieid paralok, khamtam ïa ki paradoh parasnam. Ka ktien U Blei ka ong Jeremaïah 33:6 ‘Ha khmih ngan wallam ha ka, ka jingkoit jingkhiah bad ngan pynkhiah ïa ki’.
“Ngi ka HYC ngi wan hangne ban kitbok ïa phi hep, phin ïoh jingïarap na U Blei ngi shu ïarap kum ka dak kaba rit eh bad ngin ïai duwai lem, ba phin ïoh ka met kaba koit khiah noh kaba U Blei un ïarap”, u la ong.
U la ong ruh, “Ngi ka HYC ngi kyrpad ruh ïa ka tnad bording MePDCL ban ïarap lem ïa utei u khynnah rit bad ban peit bha ïa baroh ki wire khnang ban leit na ka jingsngewsih ki doh ki snam jong ngi”.
