Hadien 26 snem kyrtiang dien biang u MDC barim ka Nongstoiñ sha ka Congress

Nongstoiñ, Lber 31: U Bah Nondi Diengngan MDC barim bad ba nyngkong eh na ka seng Congress ha Nongstoiñ, u la phai biang sha ka party hadien 26 snem tam ba um don shuh bad ka seng.
Ïa ka jingwan phai biang jong u sha ka Congress, la pdiang sngewbha da ki nongïalam ba hakhmat ka party ha ka jingïalang kaba la long ha Congress Bhavan Nongstoiñ ha ka sngi saitjaiñ.
Haba ai jingkren ha ka jingïalang pdiang burom u Bah Nondi Diengngan u la pynpaw ba ka jingwan phai jong u sha ka Congress, kam dei satia na ka bynta kano kano ka myntoi shimet lane ban don da kino kino kiwei pat ki jingthmu. Hynrei, naduh ba u la long u MDC na kane ka party bad hadien ki 26 snem tam jong ka jingïaid lynti, u ïohi ba dei tang ka Congress party kaba lah ban ai ka jingshakri kaba hun sha ki paidbah.
“Ngam shym rung sha ka party da ka jingmut ban ïoh ei ei, hynrei haba nga peit bad pynshong nongrim bha, nga ïohi bad sngewthuh shai ba dei tang ka Congress hi kaba lah ban ai ka jingshakri kaba pynhun ïa baroh ha baroh kawei ka ri”, u la ong.
“Lada phai sha ka shongsuk shong saiñ khamtam eh dei tang ka Congress hi kaba lah ban ai jinghun sha ki nongshong shnong ka ri. Lada ngin ïakren ïa ka niam ka rukom bad jingmane Blei, ka riti dustur, ka jinglong tynrai bad jinglong kyrpang, dei tang ka Congress kaba ai laitluid khlem ñiew shilliang khmat”.
“Dei lyngba ka jingïalam bad jingsynshar ka sorkar Congress ba ngi ïoh ïa la ka Jylla ha ka por ka (L) Mrs Indira Gandhi. Ngi ïoh ïa ka District Council ruh lyngba ka sorkar Congress ha ka por jong u (L) J.J.M Nichols Roy. Nangta ki matti ba khraw kum ka NEIGRIHMS, ka NEHU bad kiwei kiwei ruh, dei lyngba ka sorkar jong ka Congress ba ngi ïoh”, u la ong.
“Lada ngi phai sha baroh ki seng saiñ pyrthei, dei tang ka Congress kaba pynïoh ha ngi ïa ka jinglaitluid ba shisha. Dei halor kine ki nongrim ba nga phai biang sha ka party da ka jingkyrmen bad jingtrei shitom ban pynïoh pat ïa ka burom jong ka party”, u la ong.
U Bah Gabriel Wahlang MLA ba nyngkong eh na ka party Congress ha Nongstoiñ, u ba bat ruh mynta kum u MDC, haba ai jingkren pdiang burom, u la pynpaw ïa ki kyntien sngew burom jingai khublei kyrpang bad kyrmen ba kane ka jingwan pynïasoh biang jong u ne u rangbah, kan nang ai mynsiem ïa u kum u MLA bad ïa ka party hi baroh kawei, ba kin lah ban trei bha na ka bynta ka Constituency baroh kawei.
“Nga ngeit skhem ba kane ka jingwan pynïasoh jong phi ka long ka dak jingkyrmen ba ngin lah ban pynjop don burom ïa I Bah Vincent Pala ha kane ka elekshon MP. Ka jingjop I ma Pala kyrmen ba yn ïoh ban synshar noh ïa ka ri da ka Congress, khnang ba ka shong suk shong saiñ kan wan phai bïang bad ka ban long ruh ka jingkyrmen khamtam ïa ngi ki rit paid”, ong u Bah Gabriel.
Kiwei kiwei kiba donlang ha kane ka jingïalang ki long Bah N.Nongdkhar MDC barim ka Nongstoiñ u ba pynïaid ïa ka jingïalang, Bah Bormanding Nonglang District President, ki riew rangbah nongïalam ba hakhmat jong ka party, I kong Lila Nongkhar iwei na ki nongïalam na ka liang ki kynthei, nangta ki nongïalam jong ki samla Congress na Nongstoiñ bad kiwei kiwei.