Shillong, Lber 31 : U Returning Officer jong ka Shillong Parliamentary constituency, ha ka sngi Saitjaiñ u la pynbna paidbah ïa ka shap (symbol) jong ki arngut ki kyrtong shimet kiba aireng ha kane ka elekshon MP na kane ka constituency nalor kiwei ki kyrtong ba aireng na ki party ba la ithuh da ka Election Commission jong ka Ri.
U Prof Lakhon Kma u la ïoh da ka shap jong u shang soh (basket containing fruits) katba u Bah Peter Shallam pat u la ïoh da ka shap jong u Mawlynnai (Diamond).
Ki shap jong kiwei pat ki kyrtong ki kynthup ïa ka Dr. M Ampareen Lyngdoh jong ka NPP ha ka shap jong ka ‘kot’, nangta u Dr. Ricky A Syngkon na ka VPP ha ka shap jong u ‘prah’, u Bah Robertjune Kharjahrin jong ka UDP ha ka shap jong ka ‘bom’ bad u kyrtong ka Congress Bah Vincent H Pala ha ka shap jong ka ‘kti’.
Lah ban kdew hangne ba ka tarik ba khatduh ba ki kyrtong ki lah ban weng kyrteng kadei ha kane ka sngi Saitjain, ka 30tarik u Lber hynrei ym shym la don u/kawei ruh ki kyrtong ban weng kyrteng.
Haba phai pat sha ka elekshon ha Tura Parliamentary constituency, ki don saw ngut ki kyrtong, kynthup naduh ka kyrtong jong ka NPP ka Agatha Sangma, nangta u kyrtong jong ka Congress, u Saleng A Sangma, u kyrtong ka TMC u Zenith Sangma bad u kyrtong shimet, u Labenn Ch Marak.
