Khliehriat, Lber, 31: Ki nongïalam bad ki dkhot jong ka Hynñiewtrep Achik National Movement (HANM), East Jaiñtia Hills District hapoh ka jingïalam u samla Comingsoon Dkhar bad u Vice President, u samla Bormi Ryngkhlem myn ha ka miet jong ka 29 tarik u lber ki la ioh bat ïa ki nongñiah trok kiba ñiah ïa ki kali ba kit Gas (LPG Gas) katba ki dang pyndap lyer (Gas) ha ki tyndong Gas ha rud ka surok National Highway 6 ha Tuber Tahkhniang, East Jaiñtia Hills District bad ong ba kane ka jingleh kitei ki nongñiah trok LPG ka long kaba beaiñ bad kaba buh jingma ïa ka jingim briew.
La ong ba ki la don haduh san tylli ki trok ba kit LPG kiba ieng ha Tuber Tahkhñiang kiba die beaiñ ïa ki Gas sha ki briew.
Kitei ki nongïalam jong ka seng lem bad ki dkhot kiba la ïa don lang ha katei ka miet, ki la pynpaw ka jingsngew khia halor kane ka jingleh beaiñ kitei ki nongñiah trok LPG kiba dei ruh ki ar jylla, namar lada shu pyndap lyer kumne ka lah ban buh jingma bha ïa kito kiba pyndonkam ïa ki tyndong lyer ba shet jingshet bad lehse ioh kam wanrah ruh kano kano ka jingjia ba sngewsih.
Ki nongïalam bad ki dkhot jong ka seng ki kyntu jur ïa ki paidbah ba kim dei da lei lei ruh ban thied beaiñ ïa ki Lyer ne Gas na ki kali ba kit LPG namar kane ka buh jingma ïa ka jingim briew.
Ka seng ka maham jur ïa baroh ki nongñiah kiba ñiah ïa ki trok ba kit LPG Gas ba kim dei da leilei ruh ban shu die beaiñ ïa ki LPG Gas ha surok bad lada lap biang sa shisien ka seng kan leh da kaba tyngeh bad kan aiti ruh sha ki bor jong ka aiñ bad ruh lada jia kano kano kaba sngewsih kiba ñiah trok LPG Gas kiba die beaiñ ïa ki Gas ki dei ban shim îa ka jingkitkhlieh.
