Rakhe ka tnad PHE ïa ka World Water Day ha Ri Bhoi, donkam ban kunai ïa ka um, ka jingim u khun bynriew

Nongpoh, Lber 23: Kum ban ïa snoh kti ha satlak ka pyrthei ban sngewthuh ïa ka jingkordor jong ka um kaba long ka jingim jong u khun bynriew bad baroh ki kynja ba im, ka District Water and Sanitation Committee Ri Bhoi ryngkat ka jingïatrei lang ba ka tnad PHE Ri Bhoi haka 22 tarik mynta u bnai ki la rakhe ïa ka sngi kyrpang ka um ba la tip kum ka ‘World Water Day’ ha NSCA Indoor Stadum Nongpoh.
La rakhe ruh ïa kane ka sngi da kaba la pynlong shuwa ïa ka jingïamareh Marathon, ki jingïakop rwai bad ka jingïapyni nam ïa ki jingshna ba la shim bynta da ki 3 tylli ki skul ba kynthup ïa ka Alpha English Higher Secondary School Nongpoh, Nehru Memorial Higher Secondary School Umsning bad ka St. Mary’s Secondary school Nongkrah.
Haba rakhe ïa kane ka World Water Day la wan ban shim bynta da ka Superintendent Engineer PHE ka Kong V.W Momin, Divisional Officer Soil & Water Conservation u L. Arengh EE PHE Nongpoh u Bah U.Kurbah, EE PHE Umsning u Bah W.Nongbri SDO, ki rangbah shnong bad kiwei kiwei.
Haba ai jingkren ha kane ka sngi, ki nongkren ki la ban khia jur bha halor ka jingdonkam ban ïada ïa ka um, namar ka um ka long kaba donkam tam na ka bynta jong baroh ki kynja ba im ha sla jong kane ka pyrthei.
Shuh shuh, ki nongkren ki la khot la wer ïa baroh ba ka dei ka kamram jong ngi ban ïa trei lang na ka bynta ban pynneh pynsah ïa ka um, namar khlem ka um kan nym don jingim ha kane ka pyrthei, namarkata, ka dei ka kamram jong ngi ban pynneh pynsah bad ban sumar ïa ka mei mariang khnang ba ngin nym kyrduh um ha ka pateng ban sa wan.