Nongpoh, Jymmang 22 : Kum shi bynta ban rakhe ïa ka World Tobacco Day Lane ban pyrshah ban pyndonkam ïa ki duma ne ki jingdih ba sniew, kiba ktah ïa ka koit ka khiah ki paidbah, ka Alpha English Higher Secondary School, Nongpoh dang shen ki la pynlong da ka jingïaid paidbah bad ruh ka Signature Campaign ban ïalap halor ka jingma jong u duma ne ki jingdih ba sniew.
Da ki spah ngut ki khynnah skul katei ka skul ryngkat ki nonghikai ki la shim bynta ha ka jingïaid paidbah bad ruh ka signature Campaign ban pynpaw ïa ka jingpyrshah halor jingktah jong ki jingdih basniew nadauh u duma bad kiwei kiwei ba pyndonkam da ki briew ba kane ka wan rah ka jingshah ktah ha ka koit ka khiah.
Ki la sdang ban ïaid paidbah na skul ban ïaid lyngba ka sor Nongpoh sha DTO ophis bad wan phai biang sha ka skul da kaba ki la rah ïa ki placard bad ki banner ryngkat ki jingthoh ba pyrshah ïa u duma ba la tip ha ka ktien nongwei, ‘Anti-tobacco day’ ba bun ki la shah ktah na ka jingdon ka jingmlien basniew ban dih ïa kitei ki jingdih ba sniew.
Haba ïaid paidbah ha ki surok paidbah ki khynnah skul ki la rah da ki placard bad ki banner ryngkat ki jingthoh ba pyrshah ïa ka jingdih duma ne ki jingdih ba sniew, kiba ktah ïa ka koit ka khiah ki paidbah.
Ki nonghikai ba kynthup ïa u Babu Daiar Pyrbot bad ka Kong Deigratia Kharbyngngar kum ki nonghikai ki la ong ba ki la pynlong kane ka jingïaid paidbah bad ruh ka signature campaign ka dei shi bynta ban ïalap sha ki paidbah ka Ri Bhoi bad ka jylla hi baroh kawei, ba ka jingmlien ban dih ïa u duma bad kiwei ki jingdih bansiew ki ktah shisha ïa ka koit ka khiah jong u briew.
Ki la ong rh ba ngi kwah ban phah ïa ka khubor sha baroh ki paidbah ka jylla ba u duma bad kiwei ki jingdih basniew ki long shisha ki jingma ïa ka koit ka khiah ki paidbah bad ïa kane la kren ruh da ki stad shemphang jong ka tnad ka koit ka khiah.
Haba pynlong ruh ïa kum kine ki jingïalap pyrshah ïa u duma, kane kan ai ruh ka nuksa ym tang ïa ki paidbah bad wat ïa ki khynnah skul jong ka skul ruh kin tip ba ka jingdih ne bam ïa u duma, kane kan ktah ym tang ïa kito kiba pyndonkam bad ka ktah ruh wat ïa ki paidbah ba ïa don lang khamtam kum u sikret bad biri ne kiwei kiwei ki jingdih ba pynmih tdem.
Namarkata, kum ki nonghikai bad ki khynnah skul ki buh ruh ïa ka jingkyrpad sha ki bor sorkar bad ki bor district ba ngi hap ban don ka jingïatrei lang na baroh ki liang ban pynduhjaid ïa ka jingdih basniew bad lada don hi kata ka jingïatrei lang na baroh ki liang kane kan ïarap shibun ïa ka thong ban rad dyng khong ïa ki jingpyn donkam ïa ki jingdih ba sniew la ka long kino kino ki jingdih ba sniew kiba ktah ïa ka koit ka khiah jong u briew, ki la bynrap.
