Buddien ka Synjuk ki Rangbah Shnong naka Myntri ïa ki kam sahteng ha Ri-Bhoi
![](https://mawphor.com/wp-content/uploads/2022/07/mawphor-1.jpg)
Nongpoh, Lber 11: Ki nongïalam ka Sunjuk ki Rangbah Shnong Ri-Bhoi District (SRSRB) mynta ka sngi ki la leit ban ïa kynduh ïaka Dr. Ampareen Lyngdoh ka myntri ba dei peit ïaka tnad ka koit ka khiah ha Circuit House, Nongpoh ban pynkynmaw biang ïakiba bun ki kam sahteng haka tnad ka koit ka khiah haka them Ri-Bhoi.
Haba kren sha ki lad pathai khubor, u Bah PB Sylliang Secretary jong ka Synjuk ki Rangbah Shnong, Ri-Bhoi District haka jingdonlang u bah BB Makdoh Chairman lem bad ki dkhot, u la ïathuh, ba ha kane ka jingïakynduh ïaka Myntri, naka liang ka Synjuk ka la ioh ban pynkynmaw biang ïaki kam sahteng kiba la dei ban pyntreikam la slem kiba kynthup ïaka Maternity & Child Hospital kaba don ha Parila Umsning bad ka Trauma & Emergency Center kaba don ha Nongpoh Civil Hospital.
U Bah PB Sylliang u la ïathuh ruh, ba naka liang ka Synjuk ka la wad jingtip ruh naka myntri halor jingdonkam ban kyntiew kyrdan ïa ki sub center bad PHC kiba don ha kylleng jong ka Ribhoi kumba ladep ban ïakren ha ka jingïalang kaba la long ha u snem bala dep baki don ki jaka ai jingsumar kiba la donkam shisha ban kyntiew kyrdan.
La ïathuh ruh ba ki la ioh ban ïakren halor Ka jingduna ka jingdon ki doctor bad ki staff nurse haki jaka sumar bapher bapher, hakaba naka liang ka Myntri ba dei peit iaka koit ka khiah ka la ïathuh ba ki la dep ban pynlait ïaka jingpynbna bad kumba 27 ngut ki ban trei naka bynta ka koit ka khiah bad kin sa khot noh ïaka interview ha kine ki bnai ki ban sa wan.