Nongpoh, Lber 11: Ka seng Hynñiewtrep Youth Council (HYC) Ri-Bhoi Sepngi mynta ka sngi kala leit ban ïakynduh bad ka myntri ka tnad ka koit ka khiah ka kong Ampareen Lyngdoh hadien ba kala wan ban hiar sha Nongpoh naka bynta ban ïakynduh bad ki paidbah ka dong Ri-Bhoi ha Circuit House Nongpoh, bad naka liang ka seng kala ioh ruh ban pynsngew bad aiti da ka dorkhas sha ka myntri halor ka jingdonkam ban kyntiew kyrdan noh ïaka Umsong Sub Center sha ka PHC kaba la donkam eh hakatei ka thaiñ bad kum ki paidbah kila angnud la slem.
Haba kren sha ki lad pathai khubor hadien jong ka jingïakynduh bad ka kong Ampareen Lyngdohu Samla RC Thangkhiew, President ka HYC Ri Bhoi Sepngi u la ïathuh ba kane ka Umsong Sub-Center ka dei ka jaka ai jingsumar kaba la slem lada ïa nujor bad kiwei pat, bad kane ka sub-center ka ai jingsumar palat ïaki 15 tylli ki shnong bad ka wan rah jingeh ruh ïa ki paidbah jong kitei ki shnong ban leit sha ki PHC namar ba ka la jngai kum 17 kilometre na katei ka Sub-center.
U tei u nongïalam ka HYC u la ïathuh ba namar ka jingbun tylli ki shnong bad ka jingjngai ba ki paidbah ki mad jingeh kala long kaba donkam eh ban kyntiew kyrdan noh ïa ka Umsong Sub-Center sha ka PHC. U la ïathuh ruh ha kane ka jingïakynduh bad ka Dr. Ampareen Lyngdoh, myntri jong ka koit ka khiah ka la long kaba sei soh ha kaba naka liang ka myntri kala kular ban shimkhia ïa kane ka mat, bad naka liang ka Seng HYC ka kyrmen ba ka jingangnud ban kyntiew kyrdan noh ïaka Umsong Sub-Center sha ka PHC kan urlong noh shen.
