Mawkyrwat, Rymphang 29: Ka Khasi Students’ Union (KSU) jong ka Mawkyrwat Circle mynta ka sngi ka leit ban ïa kynduh ïa u District Medical & Health Officer (DM&HO), South West Khasi Hills District, Mawkyrwat ban kylli bniah halor ka jingjah rngai ki katto katne ki kam ne advertisement post hapoh ka 10 Bedded Integrated Ayush Hospital, Mawkyrwat.
Ha ka shithi ba ki la phah ha u District Medical & Health Officer (DM&HO), South West Khasi Hills District, Mawkyrwat kum ka seng pdiang kylluid mynsiem ïa ka jingthmu jong ka National AYUSH Mission ban pyntreikam pura noh ïa ka 10 Bedded Integrated Ayush Hospital kaba don ha Mawkyrwat bad kyrmen ruh ba kane ka shnat treikm ban ai jingsumar kan long ka jingkyrkhu ïa ki paidbah ka thaiñ hi baroh kawei.
Hynrei kaba sngewsih pat ka long ba kumba la lah ban sakhi na ki lad pathai ba ka jingkhot pynrungkam (Advertisement Notice) lyngba ka ophis DM&HO kaba ïadei bad kane ka Ayush Hospital jong ka South West Khasi Hills District, la ïohi ba ka jingkhot thep lam ne advertised posts ka long tang ïa ki 24 tylli ki post na ki 40 tylli kumba ka dei ban long katkum ka mang ba pura bad ki jah haduh 16 tylli.
Namarkata, ka KSU ka buh jingkylli halor kane bad ha kajuh ka por ruh ka kyntu ïa ka ophis DM&HO ba kane ka jingkhot pynrungkam lane ka Advertisement kan long beit pura na ka bynta baroh ki post ha dei ban pyllait kata, baroh 40 tylli ym ban pynjah rngai. Kumta, ïa ki post ba dang sah ruh dei ban pynbna noh khnang ba ki samla wad kam na ka thaiñ kin ïoh ban pyrshang thep noh katkum ka jingibit jong ki.
Ym tang kata, ka seng ka ban jur ïa kane ka mat khnang ba kan ym don kano kano ka jingleh shilliang bad ban pyntikna ruh ba ka rukom thung kam thung jam kan long kaba khuid ba suba.
Haba kren ha ki lad pathai khubor, na ka liang ki nongïalang ka KSU ba kynthup ïa u bah Plosborlin Kharjahrin bad u bah Forwardman Nongrem ki la pynpaw ba kane ka jingjah kyrteng ïa ki 16 tylli ki post ka don lypa kaei re kaei sha lyndet. Kumta ka jingkyrpad na ka liang ka KSU ka long ba haba la bhah 40 tylli ki kam na ka bynta ki samla kiba don jingthmu ban thep, dei ban pyni paidbah baroh 40 tylli ym ban buh rieh ïa ki.
“Kiba jah na ki 40 tylli ki post ki long ka ‘Office Assistant cum DEO, Ward-Boy, Ward-Girl, Sweeper, Cook, Chowkidar, Peon bad Jamadars’’ bad kane i mat ka don ei ei shalyndet da kaba thmu ban thung lyndet ïa ki briew jongno re jongno, ong u bah Forwardman Nongrem. Namarkata, kaba kum kane ka jingleh kum ka seng ka sngewbha pyrshah bad ka dawa ruh na ka ophis DM&HO, ka ophis jong u Director bad kumjuh ruh ïa u Deputy Commissioner jong ka South West Khasi Hills District ba u dei ban tuklar mardor halor kane ka bynta khnang ba ki samla thep kam thep jam jong ka distrik kin ïoh ka lad ban thep bad kin ïoh ka lad ban ïakhun. “Kam pher lah mano, kam pher ïoh mano hynrei kaba dei ban leh ka long dei ban pyni paidbah ne advertise bad pdiang ïa ki samla kiba wan ban thep.
Ïa kane ka jingleit ban ïakynduh ïa u District Medical & Health Officer (DM&HO), South West Khasi Hills District, Mawkyrwat la don lang naduh u bah Rutherford Lyngdoh, President bad u bah Plosbor Kharjahrin, General Secretary jong ka KSU Mawkyrwat Circle, u bah Forwardman Nongrem, President ka KSU South West Khasi Hills District lem bad kiwei de ki para dkhot.
