Watla don tang 2 ngut ki MLA, hynrei rkhem mynsiem ki Congress Ribhoi na ka bynta ka elekshon MP

Nongpoh, Rymphang 29: Wat lada ka Seng Congress na Ribhoi District ka don tang 2 ngut ki MLA, kata u Dr. Celestine Lyngdoh, MLA ka Umsning bad u Bah Charles Marngar, MLA ka Mawhati, hynrei ka mynsiem pat ka rhem na ka bynta ban pynjop ïa u Bah Vincent H. Pala kum u MP na Shillong Parliamentary Seat.
Kane ka la paw ha ka jingïalang ba la khot da ka Ri Bhoi District Congress Committee ïa ki nongkitkam na ki Block bapher bapher jong ka District kaba la long mynta ka sngi ha phyllaw ïing u MLA ka Umsning, ha Umsaitsning.
Ha kane ka jingïalang la don lang ruh u kyrtong ka Party na ka Shillong Parliamentary Seat u Ma Vincent H Pala, u nongialam ka liang pyrshah u Bah Ronnie V Lyngdoh, u President ka RBDCC u Bah Charles Marngar, u MLA ka Umsning Konstituensi u Dr. Celestine Lyngdoh, u MLA ka Nongstoin u Bah Gabriel Wahlang lem bad kiwei kiwei ki nongialam ba hakhmat ka party Congress Ri Bhoi District.
Haba kren ha kane ka jingialang, ki nongkren ki la pynshai ïa ki nongrim treikam kiba ka party ka la buh hakhmat ban ïoh ïa ka jingjop ha kane ka ileksion MP kaban sa wan, ha kaba baroh ki la pynpaw ruh ia la ki kam ba la shakri paidbah khamtam ba kum ka party hi ka la noh synñiang sha ka imlang ka sahlang, ha kaba la bynrap ruh, ba kum ka party ha ka jingpynkreh ia kane ka ileksion kin hap ban ia mih madan ban pynkhlain bad tehsong ia ka party.
Ki nongkren, ki la pynpaw ruh ïa ka jingsngewkmen kaba khraw, ba u Ma Vincent Pala kum u MP ha kine ki saw term u la lah shisha ban ïeng na ka bynta ka jylla Meghalaya khamtam ia ka Shillong Parliamentary Seat lyngba ka jinglah ban iatai bad ban pan ïa ki kam pynroi bapher bapher ban kyntiew ïa ki shnong ki thaw haph kane ka Shillong PS ia kiba la nang donkam ia u briew u ba la mlien ban kren bad ban treikam hapoh ka Parliament ban nang neh bad ban wan biang kum u MP na kane ka Shillong Parliamentary Seat.
Haba kren kum u kyrtong ka party INC na ka Shillong Parliamentary Seat, u Ma Vincent Pala, u la pynpaw ïa ka jingkmen ban sakhi ba da ki spah ngut ki nongtrei ba hakhmat ka party Congress na Ri Bhoi District ki ïa tylli mlon bad ki nang treishitom ban pynkhlain ia ka party Congress watla don MLA 2 ngut hynrei la sakhi pat ïa ka jingnang khlaiñ ka party na kawei ka sngi sha kawei pat na ka jingtrei jong ki nongialam ha baroh ki Block, ki Circle bad kumta terter khamtam ruh na ka jingsngewthuh ki paidbah ia ki kam bad jingshakri ba ka party Congress ka noh synniang na kawei ka sngi sha kawei pat.
U la ong ruh, ba kum u kyrtong MP na kane ka party u dang don shibun ki jingangnud ban nang trei ban wanrah shuh shuh ia ki jingkylla ha kiba bun ki liang, kumta un nang ïai treishitom ban pynkhlain bad ban wanrah shuh shuh ïa ki kam pynroi ha kane ka jylla khamtam ha kane ka Shillong Parliamentary Seat ha ryngkat ka jingiatreilang bad ki nongïalam ka party ban nang ïoh ïa ka jingshaniah na u paidbah.
“Ki ishu kiba bun, ki jingkylli kiba bun, kaei ka CAA, kaei ka UCC bad kiwei kiwei ki bill kiba pass ha Delhi ki long kiba pyrshah ïa ka mon jong ngi”,la ong u Bah Pala, da kaba bynrap ba ïa ka CAA la pass ha Parliament la san snem hynrei ym pat ban pyntreikam, ka CAA mynshwa ka dei ka CAB ha kaba la phah sha u President ka Ri India bad lada pass da u President lashai kane ka kan sa kylla na ka Bill sha ka Act bad kiwei kiwei kiba la ktah shikatdei ïa ka mon ba laitluid jong ki nongshong shnong ka ri India”, pynpaw u Ma Pala.
U la ong ruh, ba ka jingpyrshah ïa ka CAA, khamtam ha Meghalaya kaba don marsyndah bad ka Bangladesh, Myanmar bad kiwei kiwei ki ri kiba shem jynjar ha ka shong ka sah lada kine ki wan sha Meghalaya hano kumno ngin lah ban beh ia ki namar ka don ka ain ban iada ia ki, ha Meghalaya ngi don kumba 35 lak eiei ki nongshong shnong hato, lada wan kiew ki briew nabar ka ri ban shongshnong shane kan buh jingma shikatdei ia ngi ki rit paid kiba don la ka jong ka riti ka dustur. Ngin phaikhmat ha ka thma ha Myanmar, ha Manipur ki dei ki sakhi ba shai ba kaei kan jia lada wan buhai shnong sa kiba nabar jylla lane bar ri kumta kane ka CAA kan sa long shisha ka nongshun kaba khraw tam ia ngi.
Haba ïa dei bad ka Uniform Civil Code (UCC) la pass ha Uttarkhand bad mynta sa ha Assam katba ha Parliament pat pass hynrei ki la khreh hynrei la don ka jingkhreh hynrei ki tieng ioh ka ktah ia ki katto katne ki Hindu, te mynta Uniform kaba mut kaba long salonsar, te mynta ngi bud ia ka code jong no, ka code jong u Hindu ne Muslim ne Sikh ne Khristan, haba ngi don la ka riti ka dustur, ka riam ka beit, la ka jong ka mane Blei bad ka hiar pateng te ban pynlong uniform lane kajuh ia baroh iano ngin bud, ka Hindu ka long majority te ngin bud ia u Hindu ka bym lah ban long, kumba long mynta baroh ki kyntien thylliej khamtam ha Parliament mynta ki bill la pynkylla Hindu lut ka CPC, ka CrPC mynta kim kyrteng shuh da ka English hynrei da ka Hindi haba wat ia ka kyrteng India ruh la thmu pynkylla Bharat te ngeit shano haba la tip ïa ka ri India kum ka ri kaba ïatylli wat hapdeng kiba bun ki jingïapher, hynrei ka jingleh donbor jong ka party BJP ka long shisha ka jingma ia baroh ki nongshong shnong kiba im hangne ha India bad ka jingsynshar paidbah kan don ha ka jingma kaba khraw.