Shillong, Rymphang 29: Ha Meghalaya haduh kaba kut jong u snem 2023, ki la don haduh 2,566 ki case kiba ïadei bad ka jingshah lehbor ki khunlung ki khynnah ba la rejistar katkum ka POCSO Act 2012. Na kine, 1984 tylli ki case kidei ki dang sahkut ha ka jingbishar jong ki ïingbishar ha ki District bapher bapher. Ka jinglah ban pynkhuid ne rai pynrem ka long tang 22.68%. Kine ki jingkheiñ ki long katkum ka report ba la pyllait ha ka sngi Palei da ka Meghalaya State Commission for Protection of Child Rights (MSCPCR).
Napdeng ki District kiba khlaiñ bha ka rai pynrem kadei ka Ri Bhoi District ha kaba la don 50 ngut ki runar kiba shah rai pynrem. Kaba bud kadei ka West Khasi Hills District 31 ngut bad bud sa ka East Khasi Hills District 30 ngut kiba shah rai pynrem.
Ka South Garo Hills bad South West Garo Hills kam don kino kino ki case ba shah rai pynrem imat na ka daw ba kam don Special Public Prosecutor (SPP) ki ban ïasaid ïa ki mukotduma. Ka South West Garo Hills District, wat lada ka don ka POCSO Court ba la sdang naduh u snem 2017 kam don satia kano kano ka case ba la rai pynrem.
