Pynibor ka KSU ïa ka Sorkar Jylla da kaba shna ïing ha Maxwelton Estate

Shillong, Rymphang, 29: Ka Khasi Students Union, Laban Circle ka la rai ban sa leit wad jingtip na ka tnat Election jong ka Sorkar Jylla halor ka jingïoh ïa ka Election Photo Identity Card (EPIC) da ki briew kiba sah be-aiñ ha Maxwellton Estate, ka jaka Sorkar kaba hap hapoh u pud treikam jong ka Kench’s Trace, Oxford, Rilbong (KOR).
Kane ka jingthmu ban wad jingtip ka long hadien ba ka Seng ka la shna da ka ïing hapoh ka Maxwelton Estate ha ka step sngi Palei hadien ba la kut ka jingaipor khatsan sngi ïa ki bor synshar district ban kyndang ïa ki briew kiba sah be-aiñ ha kane ka jaka da kaba ri ïa ki masi bad pyntuid jakhlia sha ka wahduid kaba don marsyndah bad ka Estate.
Kawei na ki banner ba la wah da ka KSU ha kane ing la thoh, “ka KSU kan ym ailad ïa ka Maxwelton Estate ban long ka Them Metor 2.0”.
Ha ka por 7:00 baje mynstep, ki dkhot jong ka KSU Laban Circle bad ki nongïalam ka KSU Seng Kmie ki la rah ïa ki tum ki tam bad ïa ki tiar ki tar ban shna da ka ing tap shiliang ïa ki para Khasi ba kin sah ha Maxwelton Estate. Tang hapoh khyndiat kynta ba ladep shna ïa ka ïing, la plie paidbah da u General Secretary ka KSU u samla Donald V. Thabah bad hadien kane ki dkhot ka seng ki la bamja kiew iing ruh ha kane ka jaka.
Katba ki dkhot ka KSU ki dang shna ïa ka ing, la wan poi u Magistrate bad ki Pulit kiba la tohkit halor ka jingshna jong ka seng ïa kane ka ïing ha kaba ka seng ka la pynphai nia ba ïa kane ka ing yn sa ai sha ki Khasi kiba kwah ban sah wai ha kane ka jaka.
Tang ha ka por noh sngi, ka Deputy Commisioner jong ka East Khasi Hills District Kong RM Kurbah ka la khot ïakren ïa ki nongïalam ka KSU, Laban Circle ban pynsngewthuh ba ka Maxwelton Estate ka dei kaba dang don hapdeng ka jingïaleh mukotduma bad kyntu ruh ban ym shim ïa kano kano ka sienjam kaba lah ban ktah ïa ka shongsuk shongsaiñ.
U President ka KSU Laban Circle u Samla Reuben Najiar ha ka jingïakren bad ki lad pathai khubor u la ong katba nangmih ki sngi ki bar jylla kiba sah be-ain ha Maxwelton Estate ki la nang jyllei hynrei wat hadien ba ka Seng ka ujor sha ki bor sorkar ban kyndang hynrei ka Sorkar ka shu sngap jar.
“Ka seng kam lah shuh ban shu ïai sngap kumne shi kumne ban ailad ïa kiwei ki jaidbynriew ban shna iing hangne bad kum ka jingpyrshah ka seng ka la shna shwa tang kawei ka ing ban ai sha ki Khasi namarba ki bar jylla kiba sah ha kane ka jaka ki shong ki sah khlem siew baiwai bad ki ïohei lut nadong shadong. Ki Khasi jong ngi, ki bun kiba sahwai, kiba wan pule bad kim don ïa ki jaka sah kiba biang bad ki bun kiba duk bad ki bym don ïa ki jaka sah. Ka seng ka phah kyrwoh sha kino kino ki samla pule ki bym don jaka sah, ka seng kan pynshna shwa ha Maxwelton Estate bad kumjuh ruh ïa kiwei ki nongshong shnong kiba kwah ban ri jingri kin sngewbha ban wan sha ka ophis jong ka seng ban pynshna katkum ki jingdonkam,” u la ong.
“Lada ki bor synshar district kim leh ïa kaba donkam nangne shakhmat, manla ka taiew, manla u bnai nangne shakhmat ngin pyni ba lada kiwei ki lah ban sah be-ain hangne ngi ruh ngin hap leh be-ain ba ngi sah ha kane ka jaka jong ka Sorkar,” u la ong.
Haba kynthoh ïa ka jingkren jong u Symbud Myntri Rangbah Bah Prestone Tynsong ba kane ka jaka ka dang don hapdeng ka jingïaleh mukotduma, u samla Najiar u la ong, “kam mut tangba ka dang don ka jingïaleh mukotduma ba kin shu aidaw ba ka dang don ka mukotduma hynrei kim lah ban peit pat mano ba wan bad mano ba sah.”
“Na ka por sha ka por, ki kam awria, ki kam khaii drok, ki long ka jingma ïa ki nongshong shnong,” u la ong bad bynrap, “ka sorkar ka pynlut da ki klur tyngka ban wanrah ïa ki projek ban ïada ki tyllong um hynrei kan myntoi aiu ban pynlut pisa katba ïa kine ki briew kiba pyntuid jaboh sha wah ka Sorkar kam lah ban khang.”
“Kane ka dei ka sienjam banyngkong bad lada ka Sorkar kam leh eiei wat lada poi haduh u pud ban mih madan ruh ngin hap ban mih,” u la ong.
U la kam ruh ba ki don kiwei ki kynhun niam kiba bei pisa ïa ki briew kiba sah beain ha Maxwelton Estate. “Lada kita ki lah ban bei pisa jingïarap ban sah ha kane ka jaka, ngi ruh kum ka seng ngi lah ïarap ïa ki paradoh parasnam kiba duna ka ïoh ka kot ngin pynshna da ka ing ba kin wan sah hangne,” ong shuh shuh u samla Najiar.
“Ngi la ïaid da ka lynti jong ka aiñ namarba ngi la ïoh ka jingjia ha Them Metor bad ngim kwah shuh ban ïaid da kawei ka rukom ïoh ba ka pynslem bad ka Sorkar kan sa ai jingïarap bad kin sa nang skhem shuh shuh. Ngim kwah ïa kata, bad ngi kwah ïa kine baroh ba kin mih katkum ki kyndon jong ka aiñ.” la bynrap u samla Najiar.
Haba kylli, u la ïathuh ba ki bar jylla kiba sah ha Maxwelton Estate kiba bun ki dei hi ki jaidbynriew Bihari, Nepali bad kiwei kiwei.
“Lada ki bor synshar district ki pynpra ïa ka ing ba la shna da ka KSU, ka seng kan sa shim da ki sienjam ban pynpra ïa kiwei ki ing (kiba don ha Maxwelton Estate,” la ong u samla Najiar.
Hadien ka jingïakynduh ïa ka DC, u samla Najiar u la ong namaba ka Maxwelton Estate ka hap hapoh ka Shillong Municipal Board (SMB) bad ka shah teh ha ki kyndon jong ka Municipal, namarkata, ym lah ban ri ïa ki jingri jingdub. Ka DC ka la bthah ïa ka SMB ban phah ïa ka notis bad lada kim ai jubab ka SMB kan hap ban leh da kaba tyngeh,” u la ong.
Haba kylli, une u nongïalam ka KSU u la ong ba ka DC kam don jingkhein satia katno ngut ki briew kiba sah beain ha Maxwelton Estate bad kane kan buh jingman ïa ki paidbah nongshong shnong jong ka KOR bad ïa ka nongbah Shillong.
U la ong ruh ba ka DC ka la pyntip sha ka seng ba ka Revenue Department kan sa leh ïa ka jingsorjamin bad ban phah ïa ka kaiphod. “Namarkata, ka Union ha ki sngi ban sa wan kan sa phah shithi ban pynthikna ba ka jingleh sorjamin dei ban wad bniah mano ban la sah slem bad mano kiba shu wan buhai shnong dang shen,” ula ong.