New Delhi, Lber 01: U synbud kapten jong ka kynhun lehkai hockey ka India-u Hardik Singh u la pynpaw ba ka kynhun ka khmihlynti ban ïada ïa ka Asian Champions Trophy namar kane ka long kaba kongsan ïa ka ban shah kynthup kum ka kynhun ba khlaiñbor ha ka pyrthei.
Ka Asian Hockey Federation ha ka 28 tarik Rymphang ka la pynbna ba ka lympung Men’s Asian Champions Trophy 2024 kan long ha Hulunbuir City, Inner Mongolia, China naduh 8 tarik u Nailur haduh 17 tarik Nailur.
Ki kynhun kiba la pynthikna ïalade ha kane ka lympung ki long ka China, Japan, Korea, Malaysia, Pakistan, bad ka lahduh ka ban ïada ïa ka burom-ka India.
Haba ai jingkren ha kaba ïadei bad ka jingpynkhreh ïa kane ka lympung, na ka liang jong u Hardik u la ong: “Ka Asian Champions Trophy ka dei ka lympung kaba shongshit ha kaba ki kynhun ki ïakhun ban ïaknieh ïa ka trophy bad ruh ban kylla long ka kynhun ba tbit duh na dewbah Asia. Ka thong ka long ban poi sha ki kyrdan ba hakhmat ha ka pyrthei, bad kaba donkam ka long ban ïada ïa ka trophy bad ban nang pynskhem ïa ka kyrdan kaba ngi don kum ka lahduh jong ka dewbah Asia.”
Kumban shu pynkynmaw, ka Indiaka la ïohrah ïa ka namlahduh ha ka Asian Champions Trophy 2023, kaba la long ha Chennai naduh 3-tarik Nailar haduh 12 tarik Nailar. Ki la wan hakhmat na ka Pool da 4 sien jop bad ïakhaid shi sien, ka jingïakhaid ka long pyrshah ïa ka Japan. ha ka semifinal, ka la ïakynduh pyrshah ïa ka Japan bad jop da 5-0.
Ha ka final, ka India ka la shem ïalade hapdeng ka jingeh hadien ba shah lamkhmat da 3-1 haba kut ka kylla step, hynrei ka kol na u kapten ka kynhun-u Harmanpreet Singh, Gurjant Singh, bad na u Akashdeep Singh ka la pynthikna ïa ka India ban khur ïa ka namlahduh.
