Nongpoh, Rymphang 29: Ka Joint Action Committee, Umden Area ba kynthup ïaka seng RBYDSO, RBYF, HYC, HITO bad AMKA lem bad ka Synjuk ki Rangbah Shnong Marmaiñ Area mynta ka sngi kila leit ban ujor syndon sha u DC ka Ri-Bhoi halor ka jing don ka jingbyrngem ban wah ne buh ïa ki dur Jisu ne kino kino kiba pynpaw ïaka niam khristan haka skul Sacred Heart Secondary School Marmaiñ kaba dei kawei naki skul ba don hajan khappud ka Assam bad kumjuh ruh ki skul Mission ha katei ka thaiñ.
Haba kren sha ki lad pathai khubor naka liang ki nongïalam ka Synjuk ki Rangbah Shnong, Marmaiñ Area naduh u Bah Diren Kleiñ, Bah Bistocan Timung Secretary ka All Meghalaya Karbi Association (AMKA), ki la ïathuh ba katkum ka jingtip jong ki na ki kmie ki kpa jong ki khynnah skul kiba leit skul haka skul Sacred Heart secondary School Marmaiñ, ka la don ka jingkynduh jong kawei ka kynhun bala tip kum ka Karbi Traditional Faith Association kaba la lum da ka jingïalang haka 25 tarik u Rymphang ha khappud ka Assam, bad kala don ruh ka jingbyrngem ba baroh ki dur jisu ba kynthup ruh ïa u Statue Jisu ba don hakhmat katei ka skul ba dei ban weng noh lym kumta kin sa leit ban pynpra hi.
Halor katei ka jingdon ka jingbyrngem bad ka jingpur sted ruh ki poster haki social media lyngba ki whatsapp da kawei ka seng kaba la tip kum ka Sanmilita Sanatan Samaj ha katei ka thaiñ kala wanrah ka jingsngewkhia ïa kiba bun ki nongïalam shnong bad ki paidbah khamtam ki kmie ki kpa kiba phah skul ha katei ka skul Sacred Heart Secondary School Marmaiñ kaba ktah ruh ïaka shongsuk shongsaiñ ki paidbah kiba ju im suk baroh shi katta watla ka dei ka thaiñ khappud bad ka Assam.
Dei halor katei ka Nongrim naka liang kitei ki kynhun mynta ka sngi kila leit ban ïakynduh syndon ïa u DC bad SP ka Ri-Bhoi ban pynthikna ba kum kitei ki riew shitniam kim dei ban mih pyrthei ban pynthud ïaka shongsaiñ jong ki paidbah, hynrei ba ki bor jong ka aiñ ki dei ban pynlong ka jingtohkit bad ban nym ailad ba ka huri hura kan mih ha katei ka jaka bad kiba thmu ban pynthud ïaka suk ka saiñ ki paidbah namar ka jingthmu hi jong ki ka long ban pynthud ïaka jingshakri Blei.
Kila ong ruh ba baroh shi katta ki paidbah haka thaiñ Marmaiñ bad kiwei kiwei ki shnong khappud ki shongsuk shongsaiñ bad kane ka dei ka sien ba nyngkong ba kum katei ka jingjia kan wan jia ha katei ka thaiñ bad naka liang u DC ka Ri-Bhoi u la kular ban shimkhia ïa katei ka kam bad ban phah ki bor pahara ba ki paidbah ki dei ban shongsuk shongsaiñ kumba ju long
