Shillong, Rymphang, 28: Ki nongrep synsar kiba dei na ka thaiñ Mawsynram bad kumjuh ruh na Ri Bhoi bad na kiwei ki jaka kiba dap da ka jingsngewkhia halor ka jinghiar dor kynsan kynsan jong u synsar hapoh ka jylla ha ka sngi Balang ryngkat ka jingsynran lang jong ki nongïalam ka Hill Farmer Union (HFU) ki la tur sha MECOFED, Mawiong ban wad jingtip halor ka dor ka mur jong u synsar.
“Ka jinghiardor jong u synsar ka la pynïap nong shibun ïa ki nongrep. Ki nongrep synsar na ka thaiñ Riwar bad na kiwei kiwei ki jaka ki ïoh ban kyrshan skul ïa ki khun ki kti bad ban pyndap ïa ka ing ka sem lyngba ka kam rep synsar. Ki la don ki nongrep synsar kiba la pyntip sha ngi, ba kim ïoh shuh wat tang ban siew ïa ka baikot na ka bynta ki khun khamtam ha kum kane ka por ba la plie ki skul,” la ong u President ka HFU Bah Commander Shangpliang ha ka jingïakren bad ki lad pathai khubor.
“Hadien ba jingïakren bad ki nongkhaii synsar, ngi sngewthuh ba ki don ka bor ban tehlakam ïa ka dor jong u synsar la ka long ki nongkhaii na kane ka jylla lane ki nongkhaii kiba nabar ka jylla,” la ong u Bah Shangpliang.
U la ong ba ki nongkhaii ha MECOFED ki la kam ba ka jinghiar dor jong u synsar ka dei namar ka jingbun u mar. “Ki (nongkhaii) ong ba ka jinghiar dor ka dei namarba u bun u mar, hynrei ïa kata ngim tip ïoh lehse ka dei tang ka buit jong ki bad ngi la kren da kaba shai ba kin (nongkhaii) pynkiew beit ïa ka dor ïa kaba ki nongkhaii ki la kyntait mardor,” la bynrap u Bah Shangpliang.
U la ïathuh ba ka Union kan sa leit ban ïakynduh ïa ka Myntri kaba khmih ïa ka tnat ka Rep ka Riang ka Dr Ampareen Lyngdoh ban ïakren halor ka dor ka mur jong ki mar rep bad ba ka Sorkar ka dei ban pyntreikam ïa ka Minimum Support Price (MSP).
Shuh shuh u la kam ba ki nongkhaii ki la leh da kiba bun ki buit tang ba ïoh khñiot ïa ka dor.
“Nalor ba ki nongrep ki hap ban trei shitom baroh shisnem, ki nongkhaii kim dei ban khñiot ïa ka dor namarba ka wanrah ïa ka jingduhnong kaba khraw. Ka Sorkar ka dei ban pyntreikam ïa ka Minimum Support Price (MSP) kaba ki nongrep ha ka ri baroh kawei ki dawa. Ngi iengskhem ym dei tang ïa u synsar hynrei wat ha kiwei kiwei ki mar rep ruh ka Sorkar ka dei ban pyntreikam ïa ka Minimum Support Price (MSP),” la ong shuh shuh u Bah Shangpliang.
“Ngin ym lah ban kynjoh sha kata ka thong 10 billion Dollar ba la buh da ka Sorkar, lada ki nongrep jong ngi ki dang hiar arsut,” la kynthoh u Bah Shangpliang.
Uwei na ki nongrep ka thaiñ Mawsynram u la ong, “ha u snem baladep ngi dang lah ban die ïa u synshar ha ka dor T.120-130 bad ka la ïarap khyndiat ïa ki nongrep ha ka jylla baroh kawei hynrei mynta u snem ka dor jong u synsar ngi dang ïoh ban die na ki shnong ha ka dor T.70 ha ka sien banyngkong hynrei mynta ha kine ki sngi ka dor ka hiar haduh T.40 haduh T. 30 bad kane ka pynsngewsih ïa ngi namarba ngim sngewmyntoi shuh ban dang rep.”
“Ki marwari ki la ai jingmut ïa ngi ban leit ïakren bad ka Sorkar ba kan buh da ka Minimum Support Price khnang ki nongrep kin ym duhnong,” u la ong.
“Ka Sorkar ka wanrah bun tylli ki mishon na ka bynta ki nongrep hynrei na ka bynta ki nongrep synsar ka long kaba sngewsih ba ka pynïap dor ïa ngi namarba ha iew ka dor ka hiar palat mar shiteng,”u la ong.
