Shillong, Rymphang, 28: Ki dkhot jong ka Khasi Student Union, South Khasi Hills District Unit ha ka sngi Balang ki la hiar sha ka shnong Ichamati kaba hap hapoh ka Sohra Civil Sub-division, East Khasi Hills district ban pynlong ïa ka jingkynmaw burom ïa ka lyngkhuh sngi ïap ba saw snem jong u Bah Lurshai Hynñiewta uba la shah ïap na ka jingshah bom shah tied ha ki bar jylla ha kane ka shnong Pyntha-umdan (Ichamati) ha ka 28 tarik, Rymphang, 2020.
Kum ban shu pynkynmaw, u Bah Lurshai Hynñiewta u la shah tangon ha ki bar jylla kiba la rah da ki tiar pynmynsaw ha ka sngi ba ka Khasi Students Union (KSU) ka la pynlong ïa ka jingïalang ha iew Ichamati ban pynshai paidbah bad ban pyrshah ïa ka Citizenship Amendment Bill (CAB) kaba la kylla long mynta ka aiñ. U Bah Lurshai u la khladnoh ha Sohra CHC hapdeng ka jingshitom kaba jur.
Ha ka jingleh kynmaw burom ïa une u dkhot ba la khladnoh jong ka seng, ka KSU South Khasi Hills District Unit ba la lamkhmat da u President u samla Reebokstar Diengdoh ryngkat ka kurim ka Balawanrisha Khongshei bad ki saw ngut ki khun ki la buh ïa ki syntiew hakhmat u durmot ba la tei da ka KSU ha u snem 2021.
Katba ka KSU ka dang pynlong ïa kane ka jingkynmaw burom ïa u Bah Lurshai, la sakhi ruh ba ki dukan jong ki bar jylla ha Iew Ichamati ki la khang khyrdop bad kim shym la nud satia ban plie tad hadien ba la kut noh ka jingïalang leh burom.
Na ka shnong Ichamati, ki dkhot ka KSU ki la kiew sha Sohra ban pynlong sa ïa ka jingai khusnam ïa ki samla pule jong ka thaiñ Sohra da ka 4th Maitshaphrang Academic Award kaba la long ha St John Bosco Boys Higher Secondary School, Sohra.
Ki samla kiba la shah pynkup burom ki kynthup naduh na ka shnong Umtyngngar ter ter shaduh ka shnong Shella bad ha kane ka jingpynkup burom ki don 11 ngut ki samla pule ha kaba ha ka SSLC la shim ïa kiba ïoh 85% shalor, ha ka HSSLC 80% shalor bad 75% shalor ïa ki kyrdan pule Degree bad PhD.
La sakhi lang ha kane ka sngi, da u President ka KSU Seng Kmie u samla Lambokstarwell Marngar uba la long u Kongsan ryngkat ka jingsynran lang jong u Principal ka St John Bosco Boys Higher Secondary School, Sohra u Fr. Alphonsius Rongrin
kum u symbud kongsan, u Vice Principal ka skul u Dr. Eligius Sawian, u Rangbah Shnong ka Pdengshnong, Sohra bad kiwei kiwei kynthup ka kurim bad ki khun jong u (L) Bah Lurshai Hynniewta.
