Byrngem ka JAC ban pakhang ïa ka surok NH-6 lada ym shimkhia ka Sorkar ban phah maramot noh kloi

Khliehriat rymphang 15: Ki nongïalam bad ki dkhot jong ka Joint Action Committee kaba na Narpuh, East Jaiñtia Hills District, mynta ka sngi ki la leit ban ïakynduh ïa u symbud myntri rangbah ka jylla, u bah Prestone Tyngsong bad ïakren halor ka jingpynslem ban maramot ïa ka surok national highway ha East Jaiñtia Hills District, ka JAC ka ai por khat san sngi ban sdang noh ïa ka kam ban maramot lym kumta ka JAC kan khot pynlong da ka jingpakhang surok.
Ha kane ka jingiakynduh, ki nongïalam bad ki dkhot ka JAC ki la iakren ruh halor kiwei kiwei ki mat ba kynthup ka jingwan rung tuh ki nong Bangladesh sha u pud u sam jong ka India bad ki la kyntu jur ïa ki shipai BSF ban shim khia ban tehlakam ïa kane ka jingioh rung tuh ki nong Bangladesh khnang ban wanrah ïa ka jingshngaiñ ïa ki nongshong shnong ha khappud.
Kawei pat ka mat ba la iakren ka long ba ka Dorbar Shnong Umkiang ka kyntu ïa ka sorkar ban kyntiew kyrdan noh ïa ka PHC Umkiang sha ka kyrdan CHC ha kaba u bah Prestone Tyngsong u la kular ba un sa peit bad tuklar halor kane.
Utei u Symud myntri rangbah, u la iathuh ruh ba ka kam kaba iadei bad la LCS hapoh elaka Narpuh mynta ka la iaid shakhmat ha kaba ka Ministry na ka sorkar pdeng ruh ka la pdiang, u la ai ka jingkyrmen ba ka jingpyntrei kan sa sdang noh shen bad kane ka lah ban weng ïa ki jingeh ba ki paidbah ki iakynduh man ka sngi.
Ïa kane ka JAC na Narpuh la thaw myn ha ka 10 tarik u rymphang 2024 bad kane ka JAC kan shim khia khamtam ban sei ïa ki mat kiba iadei bad ka jinglong jingman ka surok National Highway ha East Jaiñtia Hills District kaba naduh Lumshnong shaduh Malidor, ki Dorbar Shnong kiba doh hapoh kane ka JAC ki kynthup ka Dorbar shnong Ratacherra, Dona umbluh, Donaskul, Umkiang, Lumphyllut, Lumsohski, Pyrtakuna, Borsora, Kuliang, Shymplong bad Tongseng.
Ha kane ka jingiakynduh ki nongïalam ka JAC ka la buh ruh ïa ki shithi jingujor hakhmat u Symbud myntri rangbah ka jylla ha kaba iadei bad ka jingsniew palat ka surok national highway da ka jingsngew khia ki la pynpaw ba lada dang pynslem ïa ka jingmaramot ki paidbah kin kynduh jingeh biang tang shu poi ka aion slap namar ka surok ka la dap sa tang ki thliew ki syar suda, kaba buh jingma ruh ïa ka jingim briew bad ong ruh ba ka sorkar ka dei ban shim ïa ka jingkitkhlieh kaba mardor ban phah sdang noh ban maramot ïa ka surok bad lada ka sorkar ka dang pynslem ka JAC kam banse ban shim da ka synjam ba tyngeh ban khang noh shi syndon ïa katei ka surok National Highway.
Na ka liang ka Dorbar Shnong Umkiang, lyngba u Waheh Shnong, u bah Lasting Pala, ka la buh da ka jingthoh halor ka jingdawa ban kyntiew kyrdan noh ïa ka Umkiang PHC sha ka CHC, ki don haduh 16 tylli ki shnong kiba hap hapoh kane ka PHC bad ka dei ruh ka PHC kaba doh ha khapud bad lada kyntiew kyrdan ïa kane ka jaka ai jingsumar kan wanrah jingmyntoi ym tang ïa ki nong Umkiang hynrei ïa kiwei kiwei ki shnong ruh, ka Dorbar shnong ka kyntu ïa u Symbud myntri rangbah ba un shim khia halor kane ruh.