Da ka surok Saw Laiñ yn shna naduh Lad Umroi shaduh Malidor
![](https://mawphor.com/wp-content/uploads/2022/03/prestone-tynsong-in-shillong-on-may-3-750x430.jpg)
Shillong, Rymphang 13 : U Symbud Myntri Rangbah ka jylla uba dei peit ïa ka tnad PWD (Roads) u bah Prestone Tynsong u la ïathuh ba ïa ka surok naduh Lad Umroi shaduh Malidor lynter ka surok bah National Highway 6 ha East Jaintia Hills District yn sa pynheh noh sha ka surok sawliang ne ka ban ngiam ïaid saw tylli ki kali ha kajuh ka por.
“ïa kane ka kam ne projek la aiti sha ka National Highways and Infrastructure Development Corporation Limited (NHIDCL) bad mynta ka NHIDCL ka dang sorjamin bad ban ïoh ïa ki jaka ban pynheh ïa ka surok da kaba ïatrei lang bad ki bor synshar district” ïathuh u bah Prestone.
U la ïathuh ha kaba ïadei bad ka ka jingshna pynbha ïa ka surok NH-6 dang shen u la ïakren bad u Secretary ka tnad Road Transport jongka sorkar pdeng bad ïathuh ha u ïa ka jingsniew ka surok naduh thaiñ Lumshnong haduh Umkiang.
“ Kumta mynta ïa kane ka kam dang pynbha bad la peit ruh ïa ka kam da ka NHAI namar kane ka kam kam hap hapoh ka jingpeit jongka sorkar jylla hynrei jongka sorkar pdeng kumta nadong shadong ïa ka kam la peit da ka NHAI bad NHIDCL.
Ha kaba ïadei bad ka surok kaba ksam napoh lum ha Sonapur kaba ïai twa na ka por sha ka por u la ïathuh ba na ka liang u Secretary u la shim khia ïa kane ka kam bad u la kular ruh ban wan jurip da lade ïa kane ka surok.
Namar kumba long mynta ym don lad ne lynti da kumwei namar kiba bun ki riewstad heh khlieh kiba la wan jurip ïa katei ka jaka kiba la phah da ka tnad Road Transport kim lah ban leh ei ei kaei kaba lah ban leh ka long ban shu pyrshang ban ïada ban lait na ka jingtwa ba jur bad ban don beit baroh 24×7 ki nongtrei ha katei ka jaka khnang ba kin ïoh trei mar mar lada jia ba wan ka jingtwa. U la ïathuh ruh ba halor ka jingkieng Sonapur la dep shna pynbha ïa katei ka surok bad mynta ka la shngaiñ ban ïaid ki kali nalor katei ka jingkieng.