Shillong, Rymphang, 13: Ka tnat shipai BSF Meghalaya ka la phah ïa ka jingpynshai paidbah lyngba ki lad pathai khubor ha kaba ïadei bad ka jingshah leh tohmet jong u Officer Incharge ka Muktapur Veterinary Dispensary u Dr. Seiboklang Buam ha ki shipai langrut BSF kaba la jia ha ka sngi u Blei mynta ka taiew.
Ha u kyrwoh, ka tnat shipai BSF Meghalaya ka la ong, “ha ka 11 tarik Rymphang, 2024, ha ka por kumba 12:05 baje nohsngi, ki shipai langrut BSF kiba ap pahara ha khappud Indo-Bangladesh ha Hawaitila ki la ïohi ïa uwei u briew uba dang thmu ban leit sha wah Lakroh, kaba don markhap bad ka khappud. Haba ki shipai BSF ki la pynsangeh ban tohkit u la pynpaw pynban ïa ka jinglehmeng da kaba kam ba u dei u doctor Veterinary. Ha kane ka por, ula ring video ruh wat ïa ki shipai BSF kiba dang don ha ka kamram.”
“Wat hapdeng ka jingkyrpad jong ki shipai BSF ban ym ring video, hynrei une u briew u la um shym la sngap satia ïa ka jingkyrpad. Hadien kane, une doctor veterinary u la leit noh na kane ka jaka bad byrngem ruh ïa ki shipai BSF kiba dang don ha ka kamram. Hadien katto katne por, u la wan ïalam sa ïa ki nongshong shnong, bad kyrkait ïa ki shipai BSF bad ring video ban pynbudnam sniew ïa ki shipai,” la ong u kyrwoh na ka tnat Shipai BSF.
“Ka jingkynnoh pyrshah ba ki shipai BSF ki byrngem ban siat bad ban pynlaw lyngkhuid ïa u ka dei kaba shu thaw bad ka dei kaba shu ïalam bakla pyrshah ïa ki shipai BSF. Ki shipai BSF kiba ap pahara ha khappud ki ai ka jingïada ïa ki paidbah kiba shong basah ha ki shnong khappud. Kum kine ki jingkynnoh, ym tang ba ki pynsniewdur ïa ka jingtreikam jong ki shipai kiba trei shitom wat hapdeng ki jingeh kiba bun hynrei ka pynmih ruh ïa ki jingjia ki bym shongnia. Ka jingkynnoh pyrshah ïa ki shipai BSF ka dei kaba shu jler bad ka bym nongrim haei haei ruh,” la ong shuh shuh u kyrwoh.
Ha kaba ïadei bad kane ka jingjia, ha ka Lah Sngi u Blei ki Ophisar u SDO (Civil) Amlarem Dr. Abhishek Saini, u la lum jingïalang ha kaba la don lang u SDPO Amalarem Sub- Division, u Dr. Seiboklang Buam, u SHO PS-Muktapur bad ki shipai BSF.
Ha kane ka jingïalang, la ïakren sani ha kaba ïadei bad ka jingjia kaba ladep bad la shim ïa ka rai ban ïasuk noh hapdeng ki arliang mamla.
U MLA jong ka Amlarem Constituency Bah Lahkmen Rymbui uba dei ruh u Chief Advisor jong ka Sorka Meghalaya u la khot jingïalang halor kane ka jingjia. U Additional Home Secretary ka Sorkar Meghalaya, u IG Law & Order ( Meghalaya Police), u IG Border bad u IG BSF Meghalaya ki la ïakren sani halor ka jingleh tohmet jong ki shipai BSF pyrshah ïa u Dr. Seiboklang Buam.
U Inspector General jong ka tnat shipai BSF Meghalaya, hadien ba u la pyntip halor ka jingjia baroh, u la kular ba ka tnat shipai BSF kan trei na ka bynta ka bha ka miat jong ka ri, wat hapdeng ki jingtynjuh kiba bun.
Na ka liang u Inspector General ka tnat shipai BSF Meghalaya, u la pynthikna ha ka jingïalang ba ki shipai BSF ki la aiti na ka bynta ka bha ka miat bad ka jingïada ïa ka ri, wat hapdeng ka jingeh ki la shakri khlem sangeh na ka bynta ka ri bad na ka bynta ki nongshong shnong kiba sah ha khappud.
