Bun ki samla ha kane ka juk ki shah ïalam bakla haka kyrteng jaitbynriew: Bah Prestone

Nongpoh, Rymphang, 13: U Symbud Myntri rangbah ka sorkar jylla, u Bah Prestone Tynsong mynta ka sngi u la pynpaw ïa ka jingsngewbynñiaw halor ka jingshah ïalam bakla bun ki khun samla ka jylla ha ka kyrteng jong ka jaid bynriew kaba la pynduh mynsiem ïa kiba bun ki dkhot ka jaid bynriew.
U Bah Prestone Tynsong u la pynpaw ïa ka mynsiem jong ka jingbynñiaw halor ka jingshah ïalam bakla ki dkhot ka jaid bynriew, ka dei ha ka jingïalang plie ïa u Mot jong u Dr. D.D Lapang mynta ka sngi ha Ri Bhoi College.
“Teng teng ha kane ka juk kaba mynta don ka jingïasngewthuh bakla namar ha ka kyrteng ka jaid bynriew, teng teng ngi sngew ba kine ki riew rim, ki nongïalam jongngi ki khlem noh synñiang ei ei sha ka jaid bynriew. Nga kwah ban phah ïa ka khubor sha baroh ki samla jong ka juk mynta ngim dei ban klet ïa kine ki riew rangbah ki riew shemphang kiba la pynioh ïa kane ka jylla jongngi ba ngi long kumne kumba ngi long” ong u Bah Prestone Tynsong.
U la ong ruh ba kum u nongïalam, u la ju kren bad pynkynmaw khamtam ïa ki samla ka juk ba mynta ba ngi dei ban shah ïalam bakla ban ong ba kata ka jaid bynriew jong ngi ka la don ha tmier jong ka riat bad kane kam dei kumta bad ka jaid byrriew jong ngi ka dang ïeng ha u Païa uba skhem tam hapoh ka jingïalam jong ki nongïalam ba la leit noh bad kiba dang don haduh mynta.
Shuh shuh, u la bynrap ruh da kaba ong ba bun na ki dkhot ka jaid bynriew ki la long rit mynsiem ne lung mynsiem (Emotional) haba kren ïa ka ka daw bah ka jaid bynriew, hynrei kum ki khun samla kim dei ban sngewthuh bakla haba ki ïeid ïa ka jaid bynriew ki dei ban dem khohsiew khrup ha ka temple u Trai, namar tang u trai uba tip kham bha ïa ka jaid bynriew jong ngi ba un lam lynti bad ai bor ïaki nongïalam, u la bynrap.