Rai ban thaw da ka Coordianation Committee ban kiar na ki jingkulmar ki BSF bad paidbah
Shillong, Rymphang 13 : Ka Sorkar Jylla mynta ka sngi Ba-ar, ka la rai ban thaw noh da ki Coordination Committee (CC) ha ki Shnong Khappud, ban peit ban ïada ban lait na ki jingsngew ïapher jingmut hapdeng ki nongshong shnong bad ki shipai ïada khappud- Border Security Force (BSF).
ïa kane la pyntip da u Director General of Police (DGP) ka Meghalaya Dr L R Bishnoi hadien ka jingïalang bad u Symbud Myntri Rangbah ka Jylla Bah Prestone Tynsong, uba khmih ïa ka tnat kam pohïing, haka jingdon lang u Inspector General (IG) BSF Meghalaya Frontier.
Kane ka la mih hadien arsngi ka jingshah thombor u Doktor ka Animal Husbandry & Veterinary ha ki shipai BSF ha Amlarem, kaba poi sha u pud ka jingphah law lyngkhuid ïa ki jaiñ bad byrngem ruh ban siat iap ïa une u doktor.
Haba kren sha ki lad pathai khubor u Dr LR Bishnoi ula ïathuh ba ïa ki Coordination Committee yn khlieh da ki Sub Divisional Officer (SDO) haka jingdonlang ki SDPO, ki Company Commander ka BSF, ki Pulit ka Jylla bad ki nongïalam shnong bad kane ka Committee kan hap ban shong jingïalang man u bnai.
U Dr LR Bishnoi ula ïathuh ba ka jingthaw ïa ka Committee ka dei ban nang pynkhlaiñ ïa ka jingïadei hapdeng ki nong shong shnong bad ki shipai BSF kiba don ha ki thaiñ khappud.
“Man u bnai, kane ka Coordination Committee kan shong ka jingïalang bad kin don ruh ki nongïalam shnong, ban tem ïa kano kano ka jingïasngew thuh bakla bad ki BSF bad haka juh ka por ban nang pynkhlaiñ ka jingïadei hapdeng ki nong shong shnong haki thaiñ khappud bad ki BSF” la ong u Dr LR Bishnoi.
U Dr LR Bishnoi ula ïathuh ba nalor ka Coordination Committee ha Amlarem West Jaintia Hills, la thaw ruh ïa ki Coordination Committee sha ki thain Sohra, Pynursla, Dalu bad sha kiwei ki jaka ba don ktem BSF.
Ula iathuh ba haka jingïalang u IG ka BSF ula kular ba kum kine ki jingjia huri hura hapdeng ki riew paidbah bad ki BSF kin nym jia shuh hadien habud.
Haba kylli halor ka jingshah kynnoh leh tohmet u Doctor ka tnat Animal Husbandry and Veterinary haki BSF, u DGP ula ong “Ki BSF ruh ki dang pynlong ka jingtohkit bad na ka liang u IG ruh ula kular haka jingïalang ba un khmih bniah halor ka jingjia bad un phah ïaka kaiphod shaka Sorkar Jylla.